Toshkent shahri va Vyetnamning Nyachang shaharlari o‘rtasida doimiy aviareyslar qatnovi yo‘lga qo‘yiladi. Bu haqda Madaniyat va turizm vazirligi axborot xizmati xabar berdi. 

Unga ko‘ra, 29-may kuni Toshkent shahrida joylashgan International Tashkent Hotel mehmonxonasida O‘zbekiston va Vyetnam davlatlari turizm tadbirkorlarining ikki tomonlama ochiq muloqoti o‘tkazildi. Tadbir O‘zbekistonning Prestige Travel turistik kompaniyasi tashabbusi bilan Madaniyat va turizm vazirligi hamkorligida tashkil etildi.

Unda Madaniyat va turizm vazirligining mas’ul xodimlari ikki davlatning yetakchi mehmonxona brendlari va turizm kompaniyalari rahbarlari, jumladan, Prestige Travel kompaniyasi asoschisi Oybek Ahmedov, Vyetnamning VinGroup korporatsiyasi asoschisi hamda Vyetnamdagi yirik VinPearl mehmonxonalar tizimi rahbari Aleksandra Nguyen va Amega Travel Vietnam kompaniyasi boshqaruv raisi Sonya Nguyen Thi Xuan ishtirok etdi.

Qayd etilishicha, bugungi kunda O‘zbekiston va Vyetnam o‘rtasida ikki tomonlama savdo-iqtisodiy va investitsion hamkorlik kengayib bormoqda. Jumladan, ikki davlatlar o‘rtasida sayyohlar oqimi ham avvalgi yillarga nisbatan keskin ortdi. 2022-yilning yakunlariga ko‘ra, Vyetnamdan O‘zbekistonga 10 ming nafar sayyoh kirib kelgan.

2023-yilning iyun oyidan boshlab O‘zbekiston va Vyetnamning Nyachang shaharlari o‘rtasida doimiy to‘g‘ridan to‘g‘ri aviareyslar qatnovi yo‘lga qo‘yilmoqda. Bu ikki mamlakat turizm sohasida faoliyat ko‘rsatayotgan tadbirkorlar uchun yangi imkoniyat va muhim qulayliklar yaratishi ta’kidlandi.