Toshkent shahar Maktabgacha va maktab ta’limi boshqarmasi poytaxtdagi bog‘chalarning birida bolalar oyog‘iga igna sanchilgani aytilgan xabarlarga munosabat bildirdi.
Ijtimoiy tarmoq sahifalarida Yangihayot tumani 122-bog‘chada bolalarni uxlamagani uchun oyoqlariga igna tiqishayotgani aytilayotgan video xabar tarqaldi.
Aniqlanishicha, pedagogika kolleji o‘quvchisi R.M. amaliyotini o‘tash uchun Yangihayot tumani “Oriyat” MFYda joylashgan 122-sonli davlat maktabgacha ta’lim tashkilotiga 11-may kunidan 4-sonli kichik guruhga qabul qilingan.
26-may kuni shu guruh tarbiyalanuvchilarining ikki-uch nafariga uxlamagani sababli igna tiqib olingani ma’lum bo‘lgan. Hozirda talaba R.M. amaliyotdan chetlatilgan.
Mazkur holat yuzasidan Yangihayot tuman IIO FMB tomonidan surishtiruv ishlari olib borilmoqda.
“Sizning farzandingiz ta‘lim-tarbiya olayotgan muassasada yuqoridagi kabi noxush va boshqa noqonuniy holatlar qayd etilayotganiga duch kelsangiz Toshkent shahar maktabgacha va maktab ta‘limi boshqarmasi ishonch telefoni — 71 237 08 93 raqamiga qo‘ng‘iroq qilishingiz so‘raladi”, — deyiladi boshqarma xabarida.
Bundan oldin, Navoiydagi oilaviy nodavlat bog‘chada bola kaltaklangani, Toshkentda o‘g‘li qizchalarga tegajog‘lik qilgani aytilgan bog‘cha direktori ishdan olingani, Samarqanddagi xususiy bog‘chada to‘rt yoshli bola kaltaklangani to‘g‘risida xabar berilgandi.
Izoh (0)