Тошкент шаҳрининг Янгиҳаёт туманидаги 122-сонли давлат мактабгача таълим ташкилотида ухламаётган болалар оёғига игна санчилгани хабар берилди. Мазкур воқеага муносабат билдирган Тошкент шаҳар Мактабгача ва мактаб таълими бошқармаси бу ишга қўл урган амалиётчи талаба қиз айни пайтда амалиётдан четлатилганини очиқлади. “Дарё” журналисти мазкур воқеани ўрганиш мақсадида шу боғчада бўлди.
“Бу гуруҳ тарбиячиси даволанишга кетгани боис унинг ўрнида 22 майдан бошлаб ишлаб тургандим. Воқеа содир бўлгани айтилаётган куни мен ёрдамчи тарбиячим келмагани сабаб идиш-товоқларни ювиш билан овора бўлиб қолганман. Болалар оёғига игна санчилгани айтилаётган воқеа ўша пайтда содир бўлган дейишмоқда. Амалиётчи талаба мен билан бу гуруҳда икки кун ишлади. Ўша куни ҳам унинг идиш-товоқ ювишидан кўнглим тўлмагани учун уни ухлаётган болаларга қаровчи сифатида қолдириб, ошхонага чала ювилган идишларни ювишга боргандим. Бундан жудаям афсусдаман. 5-10 дақиқага бўлса ҳам болаларни ёлғиз қолдирмаслигим керак экан”, — дейди болаларнинг оёғига игна санчилгани айтилган гуруҳнинг вақтинча ишлаб турган тарбиячиси Сожида Эргашева.
Тарбиячининг айтишича, воқеа содир бўлган куни болалар ёнига қайтгач, ҳеч қайси бола оёғига игна санчилганидан ёки тарбиячи опаси уларга уришганидан шикоят қилмаган.
“Тозалик ишларини тугатиб бўлгач, болалар ёнига қайтдим. Лекин ҳеч қайси боланинг йиғлагани, опасидан шикоят қилганини эшитмадим. Жума куни эшицам, ота-оналар гуруҳида болаларнинг оёғига игна санчилган айтилган. Менга ҳам шу ҳақида айтишиб, нега қарамадингиз дейишди. Мен бу ҳақда улардан эшитаётганимни, ўша куни бунақа воқеа юз бермаганини айтдим”, — дейди гуруҳ тарбиячиси.
Сожида Эргашева воқеа ҳақида эшитгач, амалиётчи талабадан бу ҳақда сўраш имкони бўлмаганини билдирмоқда.
Воқеа содир бўлгани айтилаётган 122-сонли давлат мактабгача таълим ташкилоти директори Ҳадича Мавлонова воқеа содир бўлгач, ҳудуд профилактика инспектори ва МФЙ масъуллари ҳолатни муҳокама қилишганини, амалиётчи талаба ҳам сўроқ қилинганини айтмоқда.
“Ўша куни Ички ишлар бўлимида бу ҳақда суриштирув ишлари олиб борилди. Суриштирув ишларига мен, тарбиячи, амалиётчи талаба ва ота-оналар иштирок этишди. Ҳолат бўйича суд тиббий экспертизаси тайинланди. Ҳозирча тарбияланувчилар оёғига игна санчилгани ёки санчилмагани номаълум. Экспертиза хулосаларини кутяпмиз”, — дейди боғча директори.
Масъулнинг қўшимча қилишича, воқеа содир бўлган куни ҳақиқатан ҳам амалиётчи талаба шу гуруҳда бўлган. Гуруҳ тарбиячисининг ёрдамчиси ўша куни соғлиғидаги муаммо сабаб ишга келолмаган.
“Дарё” мухбири билан суҳбатда бўлган Тошкент шаҳар Мактабгача ва мактаб таълими бошқармаси масъуллари 20 ёшли амалиётчи талаба қиздан бундай разиллик чиқишига ишонмаслигини, ҳолат ўрганилмагунча хулоса қилишга шошилишмаётганини айтмоқда.
Фарзанди жабрланганини айтаётган оналардан бири Доно Музаффарованинг айтишича, у боласи оёғига игна санчилганини шанба куни кечки пайт билган.
“Шанба куни кечки пайт боламни чўмилтириш учун ечинтирганимда баданида игна изи борлигини кўрдим ва буни расмга олиб, ота-оналар гуруҳига ташладим. Боиси бир неча кун бу ҳақда ота-оналар шикоят қилганди. Шу сабаб бу ҳақда мен ҳам хабар бериб, ота-оналардан болаларида бунақа из бор-йўқлигини сўрадим. Биз экспертизага борганимизда игна изи дейишди. Лекин ҳали расмий жавобни олмадик”, — дейди у.
Ҳолатни ўрганаётган пайтимизда бир гуруҳ оналар боғча раҳбарияти ёнига келиб, воқеа ўша куни кузатув камераларига тушганини айтиб, камера ёзувларини беришини талаб қилди. Мактабгача таълим ташкилоти раҳбарияти эса уларни тинчлантиришга уриниб, ҳолат тасдиқланса, айбдорларга албатта чора кўрилишини билдирди.
“Дарё” воқеалар ривожини кузатишда давом этади.
Изоҳ (0)