O‘zbekistonda 819 nafar xotin-qiz orasida o‘tkazilgan tadqiqot xulosasiga ko‘ra, mamlakatda xotin-qizlarning 85 foizi o‘zini baxtli deb hisoblaydi.

Bu haqda AOKAda o‘tkazilgan brifingda “Oila va xotin-qizlar” ilmiy-tadqiqot instituti Axborot xizmati rahbari Manija Bahriyeva ma‘lum qildi. Oila va xotin-qizlar ilmiy-tadqiqot instituti tomonidan 2023-yilning fevral—aprel oylarida “Xotin-qizlarning hayotiy maqsadlari, qadriyatlari va yo‘nalishlari” mavzusida respublikaning 6 ta hududida 18 yoshdan 55 yoshgacha bo‘lgan 819 nafar xotin-qizlar orasida sotsiologik tadqiqot o‘tkazildi.

Xotin-qizlar o‘zlari uchun ayol baxtining asosini oilalarning tinchligi, farovonligi, mustahkamligi, farzandlarning borligi, oiladagi samimiy munosabatlarda va yaqin insonlarning o‘zaro g‘amxo‘rligida, deb hisoblaydi. Qishloq hududlarida yashovchi aksariyat xotin-qizlar o‘zlarini, eng avvalo, ona (40,9 foiz) va rafiqa (27,3 foiz) sifatida baholaydi.

So‘rovnomada ishtirok etgan xotin-qizlarning 68,3 foizi inson salomatligining qadrini ustun qo‘ysada amalda 16 foiz respondent uni birinchi o‘ringa qo‘ymasligi aniqlandi.