Toshkent viloyati Yangiyo‘l tumanida xotira byustini urib, noo‘rin harakat qilgan bolalarning ota-onalariga chora ko‘rildi. Bu haqda viloyat IIBB axborot xizmati xabar berdi.
Unga ko‘ra, 28-may kuni Yangiyo‘l tumanida 27-maktabning 3 nafar 6-sinf o‘quvchilari tuman markazida joylashgan, Ikkinchi jahon urushi qatnashchilari xotirasiga o‘rnatilgan byustlardan birini urib, noo‘rin harakatlar qilgan. Bolalar ushbu holat videosini Instagram ijtimoiy tarmog‘iga joylashtirgan.
Video internet foydalanuvchilari orasida ko‘plab eʼtiroz va muhokamalarga sabab bo‘ldi. Tuman IIB xodimlari tomonidan o‘quvchilar, ularning ota-onasi, maktab va mahalla masʼullari ishtirokida profilaktik suhbat o‘tkazildi. Unda o‘quvchilarga viloyat faxri bo‘lgan bunday shaxslar xotirasiga hurmatsizlik qilish noto‘g‘ri ekanligi tushuntirildi.
Ushbu holatda shaxslar voyaga yetmagani inobatga olinib, Ma’muriy javobgarlik to‘g‘risidagi kodeksning 47-moddasi 1-qismiga asosan, ularning ota-onalariga nisbatan maʼmuriy chora ko‘rildi.
Izoh (0)