Журналист ва блогерларнинг ҳуқуқий саводхонлигини оширишга мўлжалланган лойиҳа тақдимоти ўтказилди

Миллий масс-медиани қўллаб-қувватлаш ва ривожлантириш жамоат фонди ҳамда Швейцария тараққиёт ва ҳамкорлик агентлиги SDC ҳамкорлигида амалга оширилган “Журналист ва блогерларнинг ҳуқуқий саводхонлигини ошириш учун масс-медиа соҳасига оид 100 та долзарб саволларга жавоблар” лойиҳаси тақдимоти ўтказилди.

Сўнгги йилларда Ўзбекистонда сўз ва ахборот эркинлигини таъминлаш, шунингдек, оммавий ахборот воситаларини ривожлантириш фаолиятининг ҳуқуқий асосларини такомиллаштириш, журналистларнинг касбий ҳуқуқларини ҳимоя қилишга қаратилган қонунчилик базаси яратилди. Хусусан, ушбу соҳани ёки унинг алоҳида қисмларини тартибга солувчи 20 дан ортиқ қонун ҳужжатлари қабул қилинган.

Аммо мазкур ҳужжатларнинг моҳияти ва мазмуни бўйича тушунтириш ишлари ҳар доим ҳам тизимли равишда олиб борилмайди. Бу йўналишда ўтказилаётган тадбирлар кўп ҳолларда бир марталик характерга эга бўлиб, иштирокчилар сони чекланган ҳисобланди. 

Шу билан бирга, нодавлат оммавий ахборот воситалари сонининг йил сайин ортиб бориши кузатилмоқда. Шу жиҳатдан журналистларнинг ҳуқуқий саводхонлигини ошириш алоҳида аҳамият касб этади. Мазкур лойиҳа барча журналист ва блогерлар ҳамда янги ОАВни рўйхатдан ўтказмоқчи бўлганлар учун мўлжалланган.

Лойиҳа доирасида журналист ва блогерлардан юздан ортиқ саволлар келиб тушди. Тўпланган барча саволлар “Legalmах” юридик фирмаси ҳуқуқшунослари томонидан умумлаштирилиб, тизимлаштирилди ҳамда уларни ўрганиб чиқиб, саволлардан 100 тасига атрофлича жавоб берилди. Жавоблар сифатли ва қисқа видеороликлар шаклида тайёрланди.

Маълумотларни излаш қулай бўлиши учун барча жавоблар оммавий ахборот воситалари фаолияти, ОАВ фаолиятидаги чекловлар, ахборот олиш кафолатлари, шахсий маълумотлардан фойдаланиш тартиби, муаллифлик ҳуқуқи ва бошқаларни ўз ичига олган тематик блокларга бўлинган.

Жавоблар билан Миллий масс-медиани қўллаб-қувватлаш ва ривожлантириш жамоат фондининг веб-сайтига ўзбек ва рус тилларида жойлаштирилди. Шунингдек, жавоблар ёзилган видео роликлар YouTube платформасига жойлаштирилди.

Бундан ташқари, яқин кунларда Миллий масс-медиани қўллаб-қувватлаш ва ривожлантириш жамоат фонди томонидан Android ва iOS тизимлари учун мобил илова ва Telegram боти ишга туширилади.