Qo‘qon pedagogika institutining qizlar yotoqxonasiga yashirin kamera o‘rnatganlar javobgarlikka tortildi. Bu haqda Oliy sud matbuot xizmati xabar berdi.
Jinoyat ishlari bo‘yicha Qo‘qon shahar sudining 5-maydagi qaroriga ko‘ra Qo‘qon davlat pedagogika institutining Yoshlar masalalari va ma’naviy-ma’rifiy ishlar bo‘yicha birinchi prorektori O.B. Ma’muriy javobgarlik to‘g‘risidagi kodeksning 46-1-moddasi (shaxsiy hayot daxlsizligini buzish)da ko‘rsatilgan ma’muriy huquqbuzarlikni sodir etgan deb topilib, unga BHMning 15 baravari miqdorida ya’ni, 4,5 million so‘m jarima jazosi tayinlangan.
Institutning ta’lim texnologiyalari markazi xodimlari A.M., B.O. va bo‘lim boshlig‘i R.M. ham Ma’muriy javobgarlik to‘g‘risidagi kodeksning 46-1-moddasida ko‘rsatilgan ma’muriy huquqbuzarlikni sodir etgan deb topilib, ularning har biriga BHMning 10 baravari miqdorida ya’ni, 3 million so‘mdan jarima jazosi tayinlangan.
Xabarda bildirilishicha, ushbu qarordan norozi taraflar qonunda belgilangan tartib va muddatda Farg‘ona viloyat sudining apellyatsiya instansiyasiga shikoyat berish va protest bildirishga haqli.
Qizlar yotoqxonasiga o‘rnatilgan yashirin kamera voqeasi
Institut talaba qizlaridan biri 4-aprel kuni vazirlik Telegram kanalining muloqot botiga qizlar yashaydigan talabalar turar joyi xonalaridan biriga yashirincha kuzatish kamerasi o‘rnatilgani haqida ma’lumot bergandi. Farg‘ona viloyat IIB voqea yuzasidan tekshiruv o‘tkazdi. Holat tasdiqlangach, Oliy ta’lim, fan va innovatsiyalar vazirligi ushbu voqea yuzasidan xizmat tekshiruvi o‘tkazilishini va aybdor shaxslar aniqlangach, ularga nisbatan tegishli choralar ko‘rilishini ma’lum qildi. Shundan so‘ng bevosita jarayonda ishtirok etib, xizmat vazifasini suiiste’mol qilgan 4 nafar mas’ul xodim, jumladan, voqeada bevosita ishtirok etgan prorektor egallab turgan lavozimidan ozod etilgan va bir nafar mutaxassisga intizomiy jazo chorasi qo‘llanildi.
Izoh (0)