Nexta nashrining sobiq bosh muharriri Roman Protasevich afv etilganini aytdi. Bu haqda BelTa xabar berdi.
“Hozirgina, men afv etilganim haqidagi barcha tegishli hujjatlarga imzo chekdim. Bu, albatta, ajoyib yangilik”, — dedi Protasevich jurnalistlarga.
3-may kuni Minsk viloyat sudi Protasevichni sakkiz yilga ozodlikdan mahrum qilgandi. U davlat hokimiyatini tortib olishga ommaviy da’vat qilish, terrorchilik harakatlari, prezidentni haqorat qilish, Belarus haqida ataylab yolg‘on ma’lumot tarqatish va boshqa jinoyatlarda aybdor deb topilgandi. Protasevich Belarus Jinoyat kodeksining 11 moddasi bo‘yicha ayblangan.
Protasevichning hibsga olinishi
Roman Protasevich 2021-yilning may oyida Ryanair aviakompaniyasining Afinadan Vilnyusga uchayotgan samolyoti qo‘nishga majbur bo‘lganidan keyin hibsga olingandi. Hibsga olinganidan ko‘p o‘tmay, Protasevich “mamlakatga yetkazilgan zararni qoplash uchun” tergov bilan hamkorlik qilganini aytgan.
O‘shanda Protasevichning ota-onasi o‘g‘liga qo‘ng‘iroq qilib, “iqrorlari”ga tanqidiy munosabatda bo‘lishga chaqirgan. Ular “jismoniy bosim” ostida ekanligini bildirgan. Protasevich bilan birga rossiyalik Sofya Sapega ham hibsga olingan.
2022-yilning may oyida u ijtimoiy nafratni qo‘zg‘atish va shaxsiy ma’lumotlarni noqonuniy yig‘ishda ayblanib, olti yillik qamoq jazosiga hukm qilingan. U muxolifat Telegram kanalini boshqargani sababli u yerda Belarus xavfsizlik kuchlarining ma’lumotlari e’lon qilingan.
Sapega Belarus hukumatidan kechirim so‘radi, ammo rad javobini olgan. 2023-yil aprel oyi o‘rtalarida Sapega jazoni o‘tash uchun Rossiyaga ekstraditsiya qilinishiga ruxsat berilgani ma’lum bo‘lgan.
Izoh (0)