Grodno viloyati sudida Belarusda Nexta muxolifatchi Telegram kanalining sobiq bosh muharriri Roman Protasevich bilan hibsga olingan rossiyalik Sofya Sapega ishini ko‘rib chiqish boshlandi, deb xabar beradi “Zerkalo”.
Sapegaga nisbatan Jinoyat kodeksining yettita moddasi bo‘yicha ayblov e’lon qilingan:
- jamoat tartibini qo‘pol ravishda buzadigan qator harakatlarini tashkil etish;
- ommaviy tartibsizliklarni tashkillashtirish;
- ijtimoiy nafratni yuzaga keltirish;
- mansabdor shaxslarga nisbatan zo‘ravonlik bilan tahdid qilish;
- tuhmat qilish;
- jurnalistlar faoliyatiga to‘sqinlik qilish;
- shaxsiy ma’lumotlarni noqonuniy to‘plash.
Sud jarayoni yopiq tarzda bo‘lib o‘tadi.
Eslatib o‘tamiz, 23-may kuni Belarus hukumati Ryanair aviakompaniyasining Afinadan Vilnyusga uchayotgan samolyotini shoshilinch ravishda Minskka qo‘nishga majbur qilgandi. Samolyot yo‘lovchilari orasida Roman Protasevich va uning sevgilisi Sofya Sapega ham bor edi. Ular aeroportda qo‘lga olingan.
Dekabr oyida Belarus Tergov qo‘mitasi rossiyalik Sofya Sapegaga nisbatan ijtimoiy nafrat va nifoqni qo‘zg‘atish moddasi bo‘yicha yakuniy ayblov e’lon qilgandi. Ayblanuvchining o‘gay otasi Sergey Dudich aytishicha, Sapega “tergov bilan kelishuv, Rossiyaning yordam berishi va ekstraditsiyaga, ish umuman sudgacha bormasligiga umid qilgan”. Dekabr oxirlarida Sapega Belarus prezidenti Aleksandr Lukashenkodan afv so‘ragan edi.
Protasevich ham qo‘lga olinganidan keyin tergovga yordam berishni boshlagan va hukumat nazorati ostidagi OAVlarga intervyu bergandi. Hozirda u uy qamog‘ida, u internetdan foydalanishi mumkin, hozirda Protasevichga nisbatan hech qanday jarayon boshlanmagan.
Izoh (0)