SpaceX kompaniyasining Falcon 9 raketa-tashuvchisi Crew Dragon boshqariladigan kosmik kemasi bilan Axiom tijorat dasturi doirasida Xalqaro kosmik stansiyaga (XKS) uchirildi. Bu haqda kompaniya saytida xabar berildi.
Kemaga NASA sobiq astronavti va XKSning birinchi ayol komandiri Peggi Uitson qo‘mondonlik qilmoqda, uchuvchi – tadbirkor Jon Shofner, ekipaj a’zolari esa saudiyalik astronavtlar Rayyan Barnavi va Ali al-Karnidir. Ular XKSda sakkiz kun qolib, stansiyaning doimiy ekipaji bilan birga ishlaydi.
Kosmik kema Florida shtati, Kanaveral burnidagi Kennedi kosmik markazidan uchirilgan. XKS bilan tutashuv 22-may kuni Toshkent vaqti bilan 18:24 ga rejalashtirilgan.
Bu Amerikaning Axiom kompaniyasi dasturi bo‘yicha XKSga ikkinchi tijoriy parvoz bo‘ldi.
Axiom-1 ning birinchi tijoriy missiyasi 2022-yil aprel oyida bo‘lib o‘tgandi. Uchinchi (Ax-3) missiya 2023-yil oxiriga rejalashtirilgan bo‘lib, unda to‘rt kishidan iborat ekipaj XKSda ikki hafta vaqt o‘tkazadi.
Axiom-1 missiyasining har bir ishtirokchisi uchun parvoz narxi 55 million dollarga baholanmoqda.
SpaceX bilan kelishuvga asosan Axiom Space dasturi doirasida kosmik sayyohlar bilan parvozlar kelgusida yiliga ikki-uch marta amalga oshirilishi rejalashtirilgan.
Uchirishdan taxminan sakkiz daqiqa o‘tgach, raketaning qayta foydalanish mumkin bo‘lgan birinchi bo‘lagi Kanaveral burnidagi aviabaza maydonchasiga qaytib qo‘ngan.
Izoh (0)