Eng yirik kompaniyalardan biri bo‘lgan Abu-Dabi Milliy energetika kompaniyasi (TAQA) O‘zbekiston hukumati bilan O‘zbekistonning energetika sohasiga sarmoya kiritish uchun strategik imkoniyatlarni o‘rganish bo‘yicha hamkorlik boshlanganini e’lon qildi. Xususan, yangi va mavjud elektr stansiyalari hamda tegishli energetika infratuzilmasi kabilar o‘rganib chiqiladi, sarmoya qiymati esa 3 milliard dollardan ortiq bo‘lishi mumkin. Bu haqda Emirates 24 xabar bermoqda.
Strategik bitim va uni amalga oshirish to‘g‘risidagi shartnomani O‘zbekiston Energetika vazirining birinchi o‘rinbosari Azim Ahmadxo‘jayev hamda Investitsiyalar, sanoat va savdo vaziri o‘rinbosari Sarvar Hamidov, TAQA nomidan esa kompaniya bosh ijrochi direktori va boshqaruvchi direktori Yasim Husayn Zabet imzoladi.
Amalga oshirish to‘g‘risidagi shartnoma taxminan 1,5 GVt quvvatga ega bo‘lgan yashil maydonli kombinatsiyalangan elektr stansiyasi bo‘yicha takliflarni o‘z ichiga oladi. Yangi loyiha Tolimarjon energetika majmuasi yonida yo‘lga qo‘yiladi, u yerda avvalroq TAQA ikkita gaz elektr stansiyasini xususiylashtirishga sarmoya kiritish rejalarini e’lon qilgandi. Yangi hamkorlik TAQA tomonidan elektr stansiyasini loyihalash, moliyalashtirish, ta’minot, ishga tushirish, sinovdan o‘tkazish, egalik qilish va foydalanish kabilarni qamrab olishi kutilmoqda.
Shartnomalarda, shuningdek, O‘zbekistondagi elektr uzatish va taqsimlash infratuzilmasi bilan birgalikda umumiy quvvati 3 GVt dan ortiq bo‘lgan mavjud va kelgusida yaratiladigan yashil maydonda gaz bilan ishlaydigan elektr ishlab chiqarish stansiyalariga sarmoya kiritish imkoniyatlari ko‘rib chiqilmoqda.
Nashr ta’kidlashicha, ushbu kelishuvlar TAQA’ga yangi va mavjud energiya ishlab chiqarish loyihalarini qo‘llab-quvvatlash uchun O‘zbekistonga ekspluatatsiya va texnik xizmat ko‘rsatish tajribasini olib kirishga yo‘l ochadi. Kompaniya, shuningdek, O‘zbekiston hukumatining sohani isloh qilish jarayonini qo‘llab-quvvatlamoqda. Energiya uzatish va tarqatishda kompaniya O‘zbekiston hukumatiga uzatish va tarqatish tarmog‘ining ishlashi, tarmoq aktivlarini modernizatsiya qilish va yig‘ish xizmatlarini sezilarli darajada yaxshilashga yordam berish uchun xalqaro infratuzilmani rivojlantirish va ekspluatatsiya qilish bo‘yicha ilg‘or tajribasini ulashadi.
Investitsiyalar, sanoat va savdo vaziri o‘rinbosari Sarvar Hamidov O‘zbekiston TAQA bilan ushbu muhim energiya va infratuzilma loyihalarida yana bir bor hamkorlik qilishdan mamnun ekanini aytgan:
“Ushbu hamkorlik va loyihalar liniyasi barqaror va ishonchli energetika sektoriga sarmoya kiritish va qo‘llab-quvvatlash bo‘yicha mamlakatlarimiz o‘rtasidagi mavjud imkoniyatlar va umumiy manfaatlarimizga asoslanadi. Biz O‘zbekistondagi o‘zgarishlarni ilgari surish uchun TAQA bilan hamkorlikni intiqlik bilan kutyapmiz”.
TAQA guruhining bosh ijrochi va boshqaruvchi direktori Yasim Husayn Zabet shunday degan:
“TAQA O‘zbekiston hukumati bilan hamkorligimiz doirasida o‘zining keng global tajribasidan foydalanish imkoniyatidan mamnun. Birgalikda ishlash orqali biz mamlakat energetika tarmog‘ining barqaror rivojlanishini jadallashtirishimiz va mamlakatlarimiz o‘rtasidagi munosabatlarni mustahkamlashimiz mumkin. O‘zbekistonning tarmoq va ishlab chiqarish sektori imkoniyatlarini modernizatsiya qilishga yordam berishdan tashqari, mamlakatning yetakchi vazirlik idoralari bilan yaqindan hamkorlik qilish bizga xalqaro portfelimizni boyitish, jahon kommunal xizmatlari yetakchisi sifatidagi mavqeyimizni mustahkamlash imkonini beradi”.
Bitimlarni imzolash marosimida TAQA, ADNOC va Mubadala kompaniyalari ittifoqiga qarashli Abu Dhabi Future Energy Company qo‘shma korxonasi O‘zbekiston Energetika vazirligi hamda Investitsiyalar, sanoat va savdo vazirligi bilan qo‘shma rivojlanish shartnomasini imzolagan. Unda O‘zbekiston bo‘ylab bir nechta obyektlarda 2 gigavattdan yuqori bo‘lgan quyosh va shamol loyihalarini hamda 500 megavatt/soat batareya quvvatini saqlashni rivojlantirish nazarda tutilgan.
Izoh (0)