Turkiyadagi prezidentlik saylovining birinchi turida mag‘lub bo‘lgan sobiq nomzod, Ata alyansidan Sinan Og‘an ikkinchi turda prezident Rajab Toyyib Erdo‘g‘onni qo‘llab-quvvatlamoqchi. Bu haqda Anadolu Gazete xabar berdi.
“Hurriyat” gazetasi muxbiri, hukumatdagi odamlarga yaqin bo‘lgan Abdulqodir Selvining OAVga ma’lum qilishicha, Sinan Og‘an 28-may kuni bo‘lib o‘tadigan prezidentlik saylovlarining ikkinchi bosqichida amaldagi prezidentni qo‘llab-quvvatlaydi va respublikadagi islohotlar bo‘yicha Erdo‘g‘on bilan muhokama qilingan bandlarni e’lon qiladi.
Og‘an besh banddan iborat protokol imzolashi va Erdo‘g‘onni qo‘llab-quvvatlashini bildirishi kutilmoqda.
“Ushbu bandlar quyidagilarni nazarda tutadi: Konstitutsiyaning dastlabki to‘rtta bandini o‘zgartirmaslik. Konstitutsiyadan etnik turkiylikka oid bandlarni chiqarib tashlashga urinishlarning oldini olish, barcha turdagi terrorchilik tashkilotlari va terrorizmga qarshi kurash, qochoqlarni rejaga muvofiq bosqichma-bosqich deportatsiya qilish, iqtisodiy siyosatni xalqaro bozorlarga mos ravishda ishlab chiqish va foiz stavkasi siyosatida ko‘proq moslashuvchanlik”, — deyiladi nashr xabarida.
Anadolu yozishicha, Sinan Og‘an amaldagi prezident bilan uchrashishdan oldin tashqi ishlar vaziri Mevlud Chavusho‘g‘li bilan muzokara o‘tkazgan. Unga qadar Og‘an Twitter sahifasida shunday bayonot bergan:
“Shuni ayon qilishni istardikki, qarorimiz qandaydir motivlarga emas, balki turk millatining kelajagi, mamlakatimizning birligi, yaxlitligi va barqarorligi asosiy o‘rinda turishiga asoslangan, biz qandaydir umidlar emas, tamoyillar asosida tanlov qilganmiz”.
Og‘an bugun, 22-may kuni mahalliy vaqt bilan soat 17:00 da (Toshkent vaqti bilan 19:00) matbuot anjumani o‘tkazib, saylovning ikkinchi bosqichi haqidagi pozitsiyasini e’lon qilishi kutilmoqda.
Turkiya prezidentligi uchun saylovlarning ikkinchi bosqichi xorijdagi turkiyaliklar uchun boshlangan.
Saylovlar haqida
14-may kuni Turkiyada prezidentlik va parlament saylovlari bo‘lib o‘tdi. Birinchi tur natijalariga ko‘ra, Erdo‘g‘on 49,24 foiz, Qilichdaro‘g‘li 45,07 foiz ovoz olgan. Birinchi turda g‘alaba qozonish uchun nomzodga 50 foizdan ko‘proq ovoz kerak edi, shuning uchun ovoz berishning ikkinchi bosqichi 28-may kuni bo‘lib o‘tadi.
Turkiya Markaziy saylov komissiyasi ma’lumotlariga ko‘ra, 14-may kuni bo‘lib o‘tgan saylovda ishtirok etganlar 88,92 foizni tashkil qilgan. Kuzatuvchilar ovoz berishning ikkinchi bosqichida ham saylovchilarning faolligini kutishmoqda.
Izoh (0)