Toshkent shahar Olmazor tumanida hamkasbini pichoqlagan shaxs ishi sudda ko‘rib chiqildi. Bu haqda “Millar” informatsion dasturida ma’lum qilindi.
Qayd etilishicha, 23 yoshli fuqaro go‘sht mahsulotlarini ishlab chiqarish sexida birga ishlab kelayotgan tanishi bilan janjallashib qolgan. Janjal oqibatida yigit jabrlanuvchining chap ko‘krak va son qismiga pichoq urgan.
Shifokorlarning sa’y-harakatlari sabab jabrlanuvchining hayoti saqlab qolingan. Aniqlanishicha, hamkasbini pichoqlagan yigit muqaddam 16 yoshga to‘lmagan shaxs bilan jinsiy aloqaga kirishgani uchun sudlangan.
Jinoyat ishlari bo‘yicha Olmazor tuman sudida ko‘rib chiqilgan ishda ayblanuvchi Jinoyat kodeksining 104-moddasi (qasddan badanga og‘ir shikast yetkazish) 2-qismi “l” bandida nazarda tutilgan jinoyatni sodir etganlikda aybdor deb topildi. Sudlanuvchiga uzil-kesil 5 yil 6 oy muddatga ozodlikdan mahrum qilish jazosi tayinlangan.
Pichoqlashish holatlari
Toshkent shahri Mirobod tumanida 11-mart kuni 11-sinf o‘quvchisi kelishmovchilik sabab sinfdoshini pichoqlagandi. Shuningdek, Buxoro viloyati Vobkent tumanida mast fuqaro qaynukasini, Rossiyada o‘zbekistonlik erkak mast tanishining qulog‘ini kesib tashlagani, Namangan davlat universitetida erkak o‘z xotinini pichoqlab o‘ldirgani, Andijonda qo‘mitalarning birida faoliyat yuritadigan shaxsning pichoqlanish sababi ochiqlangani to‘g‘risida xabar berilgandi.
Izoh (0)