Davlat xavfsizlik xizmati respublikaning turli viloyatlarida giyohvand moddalar savdosi bilan shug‘ullanib kelgan shaxslar faoliyatiga chek qo‘ydi.
Xususan, DXXning Buxoro viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda tezkor tadbir o‘tkazilgan. Tadbirda 1970-yilda Surxondaryo viloyatining Denov tumanida tug‘ilgan, muqaddam giyohvandlik vositalari bilan bog‘liq jinoyati uchun sudlangan, hozirda Kogon tumanidagi fermer xo‘jaligida qorovul bo‘lib ishlovchi fuqaro ushlangan va undan kelgusida sotish maqsadida saqlab kelinayotgan 581 gramm opiy moddasi protsessual tartibda rasmiylashtirib olingan.
Shuningdek, tezkor surishtiruv harakatlari davomida Buxoro shahrida yashovchi, 62 yoshli fuqaro ushbu narkosavdogardan muqaddam 158 gramm opiy moddasini sotib olgani aniqlanib, undan ham ashyoviy dalillar tegishli tartibda rasmiylashtirib olingan.
Taʼkidlanishicha, mazkur giyohvandlik vositalari mamlakatga Tojikistondan kontrabanda yo‘li bilan olib kelingan.
Sirdaryo viloyatida kuzatilgan holatda esa Surxondaryo—Toshkent yo‘nalishida harakatlanayotgan Cobalt rusumli avtomashina DXX, ichki ishlar va bojxona organlari xodimlari tomonidan “Sirdaryo” YPX maskanida to‘xtatilib tekshirilgan. Tekshiruv davomida unda yo‘lovchi sifatida ketayotgan Denov tumanida yashovchi 26 yoshli fuqaro yonida 286 gramm gashish moddasi borligi aniqlangan va ashyoviy dalil sifatida rasmiylashtirib olingan. Aniqlanishicha, mazkur giyohvandlik vositalari Tojikistondan olib kelingan.
Bundan tashqari, Farg‘ona shahrida yashovchi 25 yoshli fuqaro boshqaruvidagi Malibu rusumli avtomashina “Quva—Farg‘ona” yo‘nalishida harakatlanayotgan vaqtida to‘xtatilganda, u xodimlarning qonuniy talablariga bo‘ysunmasdan, voqea joyidan qochishga uringan.
Biroq tezkor guruh tomonidan ko‘rilgan choralar natijasida avtomashina to‘xtatilib, uning haydovchisi va salonida bo‘lgan ikki fuqaro ushlangan hamda ular tomonidan yo‘l chetiga uloqtirib yuborilgan 905 gramm gashish moddasi protsessual tartibda rasmiylashtirib olingan.
So‘ngra Namangan viloyatining To‘raqo‘rg‘on tumanida yashovchi, 29 yoshli fuqaro boshqaruvidagi Matiz rusumli avtomashina Marg‘ilon shahrida to‘xtatilib tekshirilganda, unda yo‘lovchi sifatida ketayotgan Namangan shahrida yashovchi, 34 yoshli fuqaroga tegishli 925 gramm gashish moddasi borligi maʼlum bo‘lgan va ashyoviy dalil sifatida rasmiylashtirib olingan.
Shuningdek, tezkor tadbir davom ettirilib, ushbu narkotik moddalarni Tojikistondan buyurtma qilib, Qirg‘iziston orqali olib keltirgan Beshariq tumanida yashovchi 40 yoshli shaxs ham ushlangan.
Boshqa holatda esa Farg‘ona shahrida istiqomat qiluvchi 34 yoshli fuqaro Qirg‘izistondan kontrabanda yo‘li bilan keltirilgan 957 gramm gashish moddasini olib, yo‘lovchi mashinada Quva tumani hududida harakatlanayotgan vaqtida qo‘lga olingan.
Namangan—Qo‘qon yo‘nalishida harakatlanayotgan, Qo‘qon shahrida istiqomat qiluvchi 27 yoshli fuqaro boshqaruvidagi Lacetti rusumli avtotransport vositasi Qo‘qon shahri hududida to‘xtatilib ko‘zdan kechirilganda, avtomashina salonida 833 gramm gashish moddasi borligi maʼlum bo‘lgan va protsessual tartibda rasmiylashtirib olingan.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)