Qashqadaryo viloyatining turistik zonasi hisoblangan Kitob tumanida xitoylik mutaxassislar qurayotgan osma dor yo‘l salkam 2 kilometrga yetishi, ko‘prik qurilishiga taxminan 15 million dollar safrlanishi maʼlum bo‘ldi. Bu haqda “Daryo”ga viloyat hokimligi axborot xizmati rahbari Ahror Sodiqov xabar berdi.
Taʼkidlanishicha, 2023-yilning 17-may kuni Qashqadaryo viloyati hokimi Murodjon Azimov Xitoy Xalq Respublikasining China CAMC Engineering Co., LTD kompaniyasi Bosh direktori bilan onlayn muloqot o‘tkazgan.
Ahror Sodiqovga ko‘ra, uchrashuvda Kitob tumanining “Qaynar” turizm mahallasida Xitoy tajribasi asosida yiliga 200 ming mahalliy va xorijiy sayyohlarga xizmat ko‘rsatadigan zamonaviy turistik kompleks qurilishiga kelishib olingan.
“Turistik kompleksga tutash hududda soatiga 800 nafar yo‘lovchiga xizmat ko‘rsatadigan, uzunligi 1,9 kilometr va dastlabki hisob-kitoblarga ko‘ra qiymati 15 million dollar bo‘lgan zamonaviy osma dor yo‘li qurishga kelishildi. Hozirda xitoylik mutaxassislar tomonidan har ikkala loyihaning texnik-iqtisodiy asoslari ishlab chiqildi, osma dor yo‘li qurish loyihasi 2024-yilning ikkinchi choragiga qadar to‘liq yakunlanadi”, — deydi Ahror Sodiqov.
Qo‘shimcha qilinishicha, shuningdek, viloyatda xitoylik hamkorlar yordamida 20 ga yaqin umumiy hajmi 500 mvt dan ortiq bo‘lgan quyosh foto-elektr stansiyalari, mini GESlar va shamol elektr stansiyalari quriladi.
“‘Yashil shahar’ konsepsiyasi doirasida Qarshi shahriga dastlabki bosqichda 50 ta elektrobus yetkazib berish, Xitoyning suv tejovchi texnologiyalar ishlab chiqarish bo‘yicha yetakchi kompaniyalarining mahsulotlarini viloyatga yetkazib berish va ikkinchi bosqichda yil yakuniga qadar, Qarshi shahridagi erkin iqtisodiy zonada ularni ishlab chiqarishni yo‘lga qo‘yishga kelishib olindi”, — deydi masʼul.
Tadbirda viloyat hokimligi va Xitoy kompaniyasi o‘rtasida o‘zaro hamkorlikni rivojlantirish bo‘yicha 10 mvt hajmdagi quyosh panellari va invertorlarini yetkazib berishga mo‘ljallangan ikki tomonlama bitim imzolangan.
“Viloyat hokimi va mazkur kompaniya Bosh direktori boshchiligidagi vakillar bilan 2022 yil 10-noyabr va joriy yilning 16-yanvar kuni ham videokonferensaloqa formatida uchrashuvlar o‘tkazilgan edi. Shundan so‘ng, kompaniya tomonidan 5 mvt hajmdagi quyosh panellari va invertorlarini yetkazib berildi. Joriy yilning 12–13-mart va 6–7-aprel kunlari xitoylik mutaxassislar tomonidan Kitob va Shahrisabz tumanlarida turistik kompleks va osma dor yo‘li qurish joylari aniqlangandi”, — deydi Ahror Sodiqov.
Izoh (0)