2017 йилда Нью-Йоркда теракт содир этган ўзбекистонлик Сайфулло Соипов Америка суди томонидан кетма-кет саккиз карра ва бир вақтнинг ўзида икки карра умрбод, қўшимча яна 260 йиллик қамоқ жазосига ҳукм қилинди. АҚШ Адлия вазирлиги хабарига кўра, ҳукм 17 май куни чиқарилган.
Қарорни шарҳлар экан, АҚШ бош прокурори Меррик Б. Гарланд шундай деди:
“Ҳукм Сайфулло Соипов ИШИДнинг пухта режалаштирилган терактида саккиз нафар бегуноҳ одамни шафқатсизларча ўлдиргани учун унинг бутун умрини федерал қамоқхонада ўтказишини англатади”.
Ўз навбатида, АҚШнинг Нью-Йорк жанубий округи прокурори Дамиан Уильямс “саккиз карра умрбод қамоқ жазоси Соипов терактда саккиз кишининг ҳаётига зомин бўлгани учун, 260 йил қамоқ жазоси эса 18 киши, жумладан тўрт боланинг ҳаётига қасд қилишга урингани учун максимал жазо” эканлигини тушунтирди.
2023 йил январида ҳакамлар ҳайъати Ўзбекистон фуқароси Сайфулло Соиповни 2017 йилда Нью-Йоркда теракт содир этиш ва саккиз кишини ўлдиришда айбдор деб топганди.
Март ойида Соипов устидан ҳукм чиқариш жараёнида иштирок этган ҳакамлар ҳайъати қатл ҳукми учун зарур бўлган якдил қарорга кела олмади.
Соипов ва унинг жинояти ҳақида
Сайфулла Соипов 1988 йил 8 февралда Тошкент шаҳрида туғилган. 2005 йилда касб-ҳунар коллежини тамомлаган, 2005−2009 йилларда Тошкент молия институтида таълим олган. ОТМни тамомлаганидан сўнг пойтахтдаги “Саёҳат” меҳмонхонасида ҳисобчи бўлиб ишлаган.
У Қўшма Штатларга 2010 йилда грин-карта орқали борган. 2017 йил 31-октябрида у кичик юк машинасини ижарага олади ва велосипедлар ҳаракатланадиган йўлакка бостириб киради. Унинг қурбонига айланган саккиз киши орасида Аргентинадан келган беш киши ва бир нафар Бельгия фуқароси бўлган, яна 12 киши тан жароҳати олган. Соиповни унинг қорнига ўқ узган полициячи тўхтатади.
Соипов ИШИД номидан ҳаракатланганини тан олган ва ўзини ушбу гуруҳ “аскари” деб атаган. (У АҚШга кетгунига қадар жиноий жавобгарликка тортилмаган ва ҳуқуқни муҳофаза қилиш органлари эътиборига тушмаган).
Сайфулло Соипов умрининг қолган қисмини Колорадо штатидаги максимал даражада қатъий режимдаги АДХ Флоренcе федерал қамоқхонасида ўтказади. 2013 йил апрелида Бостон марафонида портлашлар уюштиришда айбланиб, ўлимга ҳукм қилинган Жоҳар Сарнаев ҳам шу қамоқхонада сақланмоқда.
Изоҳ (0)