Қозоғистон энергетика вазири Алмасадам Саткалиев Россия газининг Ўзбекистонга эҳтимолий транзити ҳақида маълумот берди. Бу ҳақда Tengrinews хабар берди.
Ҳукумат йиғилиши чоғида журналистлар Саткалиевдан Қозоғистон, Ўзбекистон ва Россия ўртасида газ иттифоқи тузиш бўйича музокаралар олиб бориляптими, деган саволни берди.
“Ҳозирги вақтда Россия газини Ўзбекистонга транзит қилиш имкониятлари муҳокама қилинмоқда, музокаралар анча конструктив руҳда олиб борилмоқда”, — дея вазир журналистларга жавоб берди.
Бундан ташқари, Қозоғистон орқали Россиядан Хитойга газ қувурини қуриш эҳтимоли бўйича ҳам музокаралар олиб борилмоқда.
“Россиядан Қозоғистоннинг шимолий ҳудудлари орқали Хитойга газ қувурини қуриш масаласи муҳокама қилинмоқда. Маршрут олдиндан белгилаб қўйилган, ушбу газ қувурини қуриш шартлари муҳокама қилинмоқда”, — деди у.
“Уч томонлама газ иттифоқи”
Россия президенти Владимир Путин ва Қозоғистон президенти Қосим-Жўмарт Тўқаев ноябрь охирида Кремлда бўлиб ўтган учрашувда Россия газини Қозоғистон ва Ўзбекистон ҳудуди орқали ташиш бўйича ҳаракатларни мувофиқлаштириш учун Ўзбекистон иштирокида “уч томонлама газ иттифоқи”ни яратиш масаласини муҳокама қилганди.
“‘Уч томонлама иттифоқ’ ғояси биринчи босқичда, эҳтимол, маълум бир юридик шахс билан мувофиқлаштириш механизмини яратиш имкониятини назарда тутади, аммо бундай масалалар ҳали ҳам муҳокама қилиниши керак”, — деб тушунтирган Песков.
“Россия, Қозоғистон ва Ўзбекистон газ соҳасида, жумладан, газ етказиб бериш ва уни қайта ишлаш соҳасида ҳамкорлик қилиш учун катта салоҳиятга эга”, — деган Россия Бош вазири ўринбосари Александр Новак.
18 январь куни эса “Газпром” Қозоғистон билан 24 январь куни Ўзбекистон билан газ соҳасида ҳамкорлик бўйича йўл харитаси имзолаган.
Ўз навбатида, Ўзбекистон энергетика вазири Жўрабек Мирзамаҳмудов декабрь ойида Ўзбекистон қўшни давлатлардан газ ва электр энергиясини қандайдир альянс ёки иттифоқ орқали эмас, балки тижорат шартномалари асосида импорт қилиш ниятида эканини айтганди.
Изоҳ (0)