Qozog‘iston prezidenti Qosim-Jo‘mart To‘qayev Xitoyga davlat tashrifi arafasida mamlakatning CCTV telekanaliga intervyu berdi. Unda siyosatchi Xitoy va Markaziy Osiyo yaqinlashuvi haqida gapirdi.
To‘qayev Qozog‘istonning tarixiy taqdiri tinch bo‘lishi, barcha davlatlar bilan, avvalo, eng yaqin qo‘shnilar bilan do‘stona munosabatlardan manfaat ko‘rishini ta’kidladi.
“Xitoy tashqi siyosatimizda juda muhim o‘rin tutadi. 2019-yil sentyabr oyida Xitoyga davlat tashrifi bilan bordim. Si Szinpin bilan ajoyib muzokaralar olib bordik. Xalqlarimizni bir-biriga yaqinlashtirish bo‘yicha o‘zaro manfaatli siyosat olib borishga kelishib oldik.
Demak, ikki davlat o‘rtasidagi strategik sheriklik, azaliy do‘stlikni rivojlantirishimiz kerak. Menimcha, bu ko‘p jihatdan qozoq xalqining manfaatlariga, uzoq muddatli manfaatlariga to‘g‘ri keladi va men bu siyosatga qat’iy sodiqman. Albatta, biz eng yaqin qo‘shnimiz – Xitoy bilan strategik sheriklik muhimligiga shubha qilmaymiz”, — dedi Qozog‘iston prezidenti.
Jurnalist Qozog‘iston prezidentidan Xitoy va Markaziy Osiyoning tobora yaqinlashib borayotganidan xavotirda bo‘lganlarning izohlariga javob berishni so‘radi.
“Bu borada hech qanday shubha bo‘lmasligi kerak, chunki bizning niyatlarimiz juda ochiq va samimiy. Gap shundaki, Xitoy o‘z iqtisodiyoti bo‘yicha dunyoda ikkinchi o‘rinda turadi, shuning uchun biz Xitoyning rolini tan olishimiz va u bilan juda yaxshi munosabatlar o‘rnatishimiz kerak”, — dedi Qosim-Jo‘mart To‘qayev.
Davlat rahbari ikki tomonlama iqtisodiy aloqalarni rivojlantirish niyatida ekanini ta’kidladi va strategik hamkorlikka oid savolga ham javob berdi.
“Xitoy Markaziy Osiyoda tobora muhim rol o‘ynamoqda va bu tabiiy hol. O‘ylaymanki, Markaziy Osiyodagi barcha hamkasblarim Xitoy bilan munosabatlarimizdan naf ko‘ryapmiz, degan fikrga qo‘shiladi. Bunday hamkorlikni rivojlantirish uchun qo‘limizdan kelganini qilamiz”, — ta’kidladi To‘qayev.
Izoh (0)