Toshkent shahrida 15-may kuni “Oltin qalam” XVII milliy mukofotining taqdirlash marosimi bo‘lib o‘tdi. Bu haqda O‘zA xabar berdi.
O‘zbekiston jurnalistlar uyushmasi raisi vazifasini vaqtincha bajaruvchi Xolmurod Salimov mamlakatimizda ommaviy axborot vositalari, jurnalistlar uchun keng imkoniyatlar yaratilayotganini ta’kidladi.
Jurnalistlar uyushmasi ma’lumotiga ko‘ra, bu yil “Oltin qalam” XVII milliy mukofoti uchun xalqaro tanlovda 500 dan ziyod OAV vakillari 4 mingga yaqin ijodiy ishlari bilan ishtirok etgan. Xususan, televideniye yo‘nalishi bo‘yicha davlat va nodavlat telekanallarda faoliyat olib borayotgan 125 nafar jurnalist qatnashgan.
Hakamlar hay’ati tomonidan ularning 900 ga yaqin ijodiy ishi ko‘rib chiqildi. Tanlovning ushbu yo‘nalishi bo‘yicha materiallari taqdim etilgan ijodkorlar orasida xalq mehrini qozongan, keng jamoatchilik e’tirofiga sazovor bo‘lgan, shuningdek, turli tanlovlarda g‘olib bo‘lgan jurnalistlar bor.
“‘Oltin qalam’ milliy mukofoti sovrindorlarini tabriklayman. Ushbu mukofot professional sohada yanada katta g‘alabalar uchun turtki bo‘lishini tilayman”, — deb yozadi Prezident administratsiyasi rahbari o‘rinbosari Komil Allamjonov.
“Tanlovni yuksak saviyada tashkil etishda Jurnalistlar uyushmasi, nomzodlarning ijodi va faoliyatini xolisona baholagan, mukofotga eng munosiblarni saralab olgan hakamlar hay’atining xizmatlarini alohida ta’kidlashni istardim”, — deya Telegram kanalida izoh qoldirdi prezident matbuot kotibi Sherzod Asadov.
Izoh (0)