Toshkent shahri Shayxontohur tumanida 14-may kuni haydovchi va ichki ishlar xodimlari o‘rtasida janjal sodir bo‘ldi. Poytaxt IIBB holat yuzasidan munosabat bildirdi.
Ma’lum bo‘lishicha, soat 18:00 da tuman yo‘l harakati xavfsizligi bo‘limi xodimlari 1986-yilda tug‘ilgan I.D. tomonidan hech qanday hujjatlarsiz boshqarib yurilgan Toyota’ni jarima maydonchasiga joylashtirgan.
Biroq hujjatlarni rasmiylashtirish jarayonida I.D. jamoat tartibini buzib, ichki ishlar organlari xodimlarining qonuniy talablarini bajarmay, ularga nisbatan qarshilik ko‘rsatgan.
Mazkur holat yuzasidan fuqaroga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik), 194-moddasi (ichki ishlar organlari xodimining qonuniy talablarini bajarmaslik) va 195-moddasi (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) bilan ma’muriy bayonnoma rasmiylashtirilgan hamda jinoyat ishlari bo‘yicha Shayxontohur tuman sudi tomonidan unga nisbatan 10 sutka ma’muriy qamoq jazosi tayinlangan.
Izoh (0)