Тошкент шаҳрида 15 май куни “Олтин қалам” XVII миллий мукофотининг тақдирлаш маросими бўлиб ўтди. Бу ҳақда ЎзА хабар берди.
Ўзбекистон журналистлар уюшмаси раиси вазифасини вақтинча бажарувчи Холмурод Салимов мамлакатимизда оммавий ахборот воситалари, журналистлар учун кенг имкониятлар яратилаётганини таъкидлади.
Журналистлар уюшмаси маълумотига кўра, бу йил “Олтин қалам” XVII миллий мукофоти учун халқаро танловда 500 дан зиёд ОАВ вакиллари 4 мингга яқин ижодий ишлари билан иштирок этган. Хусусан, телевидение йўналиши бўйича давлат ва нодавлат телеканалларда фаолият олиб бораётган 125 нафар журналист қатнашган.
Ҳакамлар ҳайъати томонидан уларнинг 900 га яқин ижодий иши кўриб чиқилди. Танловнинг ушбу йўналиши бўйича материаллари тақдим этилган ижодкорлар орасида халқ меҳрини қозонган, кенг жамоатчилик эътирофига сазовор бўлган, шунингдек, турли танловларда ғолиб бўлган журналистлар бор.
“‘Олтин қалам’ миллий мукофоти совриндорларини табриклайман. Ушбу мукофот профессионал соҳада янада катта ғалабалар учун туртки бўлишини тилайман”, — деб ёзади Президент администрацияси раҳбари ўринбосари Комил Алламжонов.
“Танловни юксак савияда ташкил этишда Журналистлар уюшмаси, номзодларнинг ижоди ва фаолиятини холисона баҳолаган, мукофотга энг муносибларни саралаб олган ҳакамлар ҳайъатининг хизматларини алоҳида таъкидлашни истардим”, — дея Telegram каналида изоҳ қолдирди президент матбуот котиби Шерзод Асадов.
Изоҳ (0)