Chevrolet Onix va Tracker sotuvi tiklangandan keyin narxlar oshirilmasligi ma’lum qilindi

UzAuto Motors may oyi boshida Chevrolet Onix va Tracker uchun shartnomalar berishni to‘xtatgandi. Kompaniya axborot xizmati vakilining “Daryo”ga ma’lum qilishicha, qayta sotuv tiklangandan keyin mashinalar uchun narx oshirilmaydi.

Cobalt va Lacetti sotib olish bo‘yicha shartnomalar tuzish to‘xtaganidan olti oy o‘tib, narxi 200 million so‘mdan yuqori bo‘lgan Onix va Tracker’ga shartnoma berish ham to‘xtagandi. “Autostrada.uz” nashri hozirda kompaniyadan sotib olish mumkin bo‘lgan eng arzon avtomobil — 420 million so‘mlik Malibu ekanini yozgandi.

Keyinchalik ma’lum bo‘lishicha, Onix va Tracker sotib olish uchun shartnomaning to‘xtatilishiga ushbu modellarning jihozlarini yangilash bilan bog‘liq masala sabab bo‘lgan. “Shartnomalar kelasi hafta qayta tiklanishi kutilmoqda. Hozir yangi konfigurasiyalar bo‘yicha shartnomalar ochilishiga tayyorgarlik ko‘ryapmiz”, — deya ma’lum qilgandi kompaniya vakili 5-may kungi suhbatda.