Amerikada Meksika chegarasi orqali noqonuniy ravishda kirib kelayotganlar jinoiy javobgarlikka tortiladi. Bu haqda jurnalist Navbahor Imomova “Daryo” muxbiri bilan suhbatda aytib o‘tdi.
Navbahor Imomovaning ta’kidlashicha, chegarani kesib o‘tish jiddiy oqibatlarga olib keladi.
“Hech kimga chegarani buzib, Amerikaga kirishni aslo tavsiya qilmayman. Bu xavfli, bu jinoyat. Chegaradan bunday kirib kelayotganlarga jiddiy choralar ko‘riladi, jinoiy javobgarlikka tortilasiz. Bedarak ketganlar ham ko‘p. Yillar davomida shu yo‘l bilan AQSHga kirmoqchi bo‘lganlar bilan gaplashib kelaman. Juda ko‘p murojaat qilishadi. Kelib, bu yerda hibsda o‘tirganlarni ham bilamiz.
Bir amallab Meksikaga kelib, buyog‘iga qanday kirsam ekan deb o‘ylanib o‘tirganlar ham bor. Ularning ko‘pidan o‘zim intervyular olishga harakat qilganman. Yashirinib yurganlari ham mavjud. Chegaraga kelib: ‘o‘z yurtimda hayotim xavf ostida, menga boshpana bering’, desangiz, Amerika har doim ham sizga ishonmasligi mumkin. Chegara xizmatidan o‘ta olmagan bo‘lishingiz, AQSHdagi tanishlaringiz sizni u yerdan olib keta olmaydi. Yaʼni bu nihoyatda qaltis va xavfli tavakkal”, — deydi “Amerika ovozi” muxbiri.
Navbahor Imomovaning aytishicha, jurnalistdan AQSHga Meksika orqali borish masalasida ko‘pchilik maslahat so‘raydi, ammo ular bilganidan qolmaydi.
“Shunday o‘zbekistonliklar borki, ular borini sotib, oilasidan voz kechib, hatto turmush o‘rtog‘i va farzandlari hayotini xavf ostiga qo‘yib bo‘lsa ham Amerikaga kelishga harakat qiladi. Bu — xavfli safar. Bunday qilmaslik kerak. Noqonuniy kelgan bo‘lsangiz sizga Amerikada ham kun yo‘q. To‘g‘ri, Qo‘shma Shtatlarda 12 millionga yaqin hujjatsiz immigrant bor. Lekin siz ‘ulardan biriga aylanib olsam, mening ham ishlarim joyida bo‘ladi, men ham Qo‘shma Shtatlarda bemalol yashab yurar ekanman’, deb tasavvur qilayotgan bo‘lsangiz, xato qilasiz. Chunki har bir migrantning boshidan nima o‘tayotganini uning o‘zi biladi.
To‘g‘ri, bu yerda 10-15 yildan beri hujjatsiz yashayotgan muhojirlar bor. Ular kimningdir yordamiga tayanadi, balki kimdir ish bergan va boshini silaydi. Lekin bu siz ham ulardan biriga aylanib qolishingiz mumkin degani emas. Qo‘shma Shtatlarda noqonuniy migrantlar hech kimga yoqmaydi. Va bir amallab yashab yurganlariga esa havas qilib bo‘lmaydi”, — deya ta’kidladi jurnalist.
Izoh (0)