UzAuto Motors Chevrolet Onix va Tracker avtomobillari sotuvini to‘xtatgani xabar qilingandi. Kompaniya vakili “Daryo” muxbiri bilan suhbatda mazkur avtomashinalar uchun shartnomalar qachon tiklanishini maʼlum qildi.
Ta’kidlanishicha, Onix va Tracker sotib olish uchun shartnomaning to‘xtatilishiga ushbu modellarning jihozlarini yangilash bilan bog‘liq masala sabab bo‘lgan.
“O‘tgan yilning avgust oyida xabar qilinganidek, Tracker va Onix qo‘shimcha variantlar bilan sotuvga chiqariladi. Yangi variantlarda isitiladigan tashqi nometall, old o‘rindiqlar, tozalash zonasi, ikkinchi qator o‘rindiqlari, rul, olti tomonlama sozlanishi haydovchi o‘rindig‘i, karter himoyasi, Redline paketi bo‘ladi. Shartnomalar kelasi hafta qayta tiklanishi kutilmoqda. Hozir yangi konfiguratsiyalar bo‘yicha shartnomalar ochilishiga tayyorgarlik ko‘ryapmiz”, – deya maʼlum qildi kompaniya vakili.
Qo‘shimcha qilinishicha, yangi variantdagi avtomobillar narxlari avvalgisidan farq qiladi. Dushanba kuni 8-may kuni narxlar eʼlon qilinishi kutilmoqda.
“O‘zavtosavdo” boti maʼlumotlariga ko‘ra, aprel oyi oxirida Tracker‘ni xarid qilish uchun navbat 17,7 ming kishidan oshgan. Onix yetkazib berish 13,7 ming xaridorni kutayotgandi.
Avvalroq Cobalt va Lacetti sotib olish bo‘yicha shartnomalar tuzish to‘xtaganidan olti oy o‘tib, narxi 200 million so‘mdan yuqori bo‘lgan Onix va Tracker‘ga shartnoma berish ham to‘xtagani xabar qilingandi. Hozirda kompaniyadan sotib olish mumkin bo‘lgan eng arzon avtomobil — 420 million so‘mlik Malibu bo‘lib qolmoqda.
“Odatda shartnomalar chiqarishni tugatish inventarizatsiya va keyinchalik narxlarning oshishi vaqtida sodir bo‘ladi. Oxirgi 5 yil ichida UzAuto Motors turli bahonalar bilan narxlarni oshirishdan avval avtomobillar savdosini to‘xtatgan”, — deya holatga munosabat bildirgan “Autostrada.uz” nashri.
Izoh (1)
Eng arzoni Malibu qolgan bólsa mana shu malibuni ham tóxtatib GM ózining ish faoliyatini ham tóxtatsa yaxshi bólardi agarda xalqning moshinaga bólgam extiyojini qondirolmasa.