“Siz ham, men ham prezidentning odami, menga o‘dag‘aylasangiz siz bilan Chingachgukdek gaplashamiz”. Qarshida IIB xodimi fuqaro manfaati uchun prokurorga qarshi chiqdi (video)

Qashqadaryo viloyatining Qarshi shahrida IIB mansabdori fuqaro manfaati uchun unga bosim qilishga uringan, o‘dag‘aylagan prokurorga qarshi chiqdi. Va unga bosim o‘tkazmasligini, IIB xodimi ham, prokuror ham prezident vakili ekanini eslatdi.

“Daryo” manbasi bergan videoda Qarshi shahar IIB, 3-sonli Ichki ishlar bo‘limi boshlig‘i Asror Jo‘rayevning shahar prokurori Alisher Mirzayev bilan muloqoti aks etgan.

“Ulug‘ ayyom kunlarida o‘tiribsiz, odamlarni bunday qaqshatmang. Yoqib yubordi emas, ustidan quydi. Xudodan qo‘rqing, tuhmat qilmang, bola-chaqa o‘stiryapsiz”, — deydi Asror Jo‘rayev Qarshi shahri prokurori Alisher Mirzayev bilan telefon orqali muloqot qilar ekan.

Ichki ishlar mansabdori shuningdek, fuqaro manfaatini himoya qilib, unga bosim qilishga uringan prokurorga “Siz prokuror bo‘lsangiz men ham qonunni yaxshi bilaman. Va fuqarolar xavfsizligini taʼminlaydigan odamman. Siz ham men ham prezidentning odami, tushundingizmi Alisherjon. Menga o‘dag‘aylamang, o‘dag‘aylasangiz, shaxsiy adovat qilsangiz, Chingachgukdek, ochiqchasiga, bitta-bitta gaplashamiz”, — deydi prokuror bilan tortishgan IIB xodimi.

Telefondagi muloqotdan maʼlum bo‘lishicha, prokuror 3-sonli IIB boshlig‘ini xonasiga chaqiradi.

“Men nima qilaman u yoqqa kelib, mana ko‘chada gaplashamiz. Xohlagan kattamga chiqing, men pensiyaga chiqsam chiqamanki, bunday qilmayman. Men xalqimni yaxshi ko‘raman, xalqimni sevaman”, — deydi Asror Jo‘rayev prokurorning topshirig‘idan noroziligini bildirar ekan.

“Daryo”ning bu haqdagi surishtiruvida ko‘maklashgan qarshilik Bobur Xodiyevning aniqlik kiritishicha, voqea 2023-yilning aprelidagi ramazon oyida sodir bo‘lgan.

“2022-yilning oktabr oyida ‘Oblbalnitsa’ning tashqarisida, shifoxona yeriga taʼsir qilmaydigan holda do‘kon qurib, oilamni boqib kelayotgan edim. 2023-yilning 8-aprel kuni Qarshi shahar prokurori Alisher Mirzayev kelib, menga qo‘pol so‘z aytib, haqorat qildi va do‘konimni buzishimni aytdi. Men esa prokurorga haqorat qilmasligini, bunga haqqi yo‘qligini aytdim. Shunga qaramasdan prokuror topshirig‘iga ko‘ra 8—13-aprel kunlari do‘konimga IIB xodimlari kelib, zo‘ravonlik qilib, do‘konimni buzdirib tashlashga urinishdi. Shu voqealardan taʼsirlangan xotinim ustiga benzin quydi. Va ko‘r bo‘lib qoldi”, — deydi Bobur Xodiyev.

Murojaatchining aytishicha, xotini benzindan jabrlangасh shahar prokurori uning shifoxonaga yotqizilishiga ham qarshi bo‘lgan.

“Xotinimning ahvoli og‘ir edi, shifoxonaga borsak, hech narsa bo‘lmagan deb chiqarib yuborishga urinishdi. Prokuror olib chiqib ketinglar degan ekan. Keyin ko‘zi ko‘rmayotganini bilishgach, 7 kun davolashdi. Xotinim ayni kunda ham ko‘rmayapti, benzin sabab ko‘r bo‘lib qoldi”, — deydi Bobur Xodiyev.

Qashqadaryo viloyat prokuraturasi matbuot xizmati “Daryo”ning bu haqdagi so‘roviga javob berar ekan, mazkur holatlarni o'rganib, batafsil axborot berishini, vaziyatga aniqlik kiritishini ma'lum qildi.

Murojaatchi 2023-yilning 12-may kuni Qarshi shahrida bo‘lib o‘tgan Bosh prokuror qabuliga kirganini, Bosh prokuror murojaatchi talabidan kelib chiqqan holda Qarshi shahri hokimi va prokuroriga o‘zini o‘zi band qilgan, shu do‘kon ortidan bolalarini boqayotgan fuqaroga yordam berishlari kerakligini uqtirgan.

“Qarshi shahar hokimi 16-may kuni shu masala yuzasidan qabuliga chaqirgan. To‘g‘ri, do‘konim qurilishi noqonuniydir, ammo shu do‘kon ortidan o‘zimni o‘zim band qildim, oilamni boqyapman. Menga yordam berishib, qonuniy qilishda ko‘maklashishsa degan fikrdaman”, — deydi murojaatchi.

“Daryo” voqealar rivojini kuzatishda davom etadi.