Qashqadaryo viloyati Nishon tumanida ayol eri bilan spirtli ichimlik ichib o‘tirgan ayolni “samosud” qilgani to‘g‘risida xabar berilgandi. Viloyat IIB holatga munosabat bildirib, jinoyat ishi qo‘zg‘atilganini ma’lum qildi.
Qayd etilishicha, 33 yoshli O.Sh. turmush o‘rtog‘i 37 yoshli O.A.ni Qarshi shahridagi ijara uyda 30 yoshli N.D. bilan qonuniy nikohdan o‘tmasdan yashab kelayotganidan xabar topgan. Shundan so‘ng, 16-aprel kuni taxminan soat 21:00 larda O.Sh. va boshqalar fuqaro N.D.ni urib, sog‘lig‘ining qisqa muddatga yomonlashuviga olib kelmagan yengil tan jarohati yetkazgan va uning erkin harakat qilishiga to‘sqinlik qilib, ruhiy tazyiq o‘tkazishgan.
Mazkur holat yuzasidan Qarshi shahar IIO FMB huzuridagi Tergov bo‘limi tomonidan Jinoyat kodeksining 138-moddasi (zo‘rlik ishlatib g‘ayriqonuniy ravishda ozodlikdan mahrum qilish) 1-qismi bilan jinoyat ishi qo‘zg‘atilib, tergov harakatlari olib borilmoqda.
“Samosud” bilan bog‘liq holatlar
Bir necha kun oldin Buxoro viloyati Kogon tumanida uch nafar ayol va bir erkak o‘zaro til biriktirib, boshqa bir ayolni “samosud” qilgandi. Shuningdek, Namangan viloyati Chust tumanida 21 yoshli yigit o‘zidan 4 yosh kichik bolalar tomonidan “samosud” qilingani, Toshkentda 5 nafar qiz tengdoshini kaltaklagani, surxondaryolik ayol bir necha ayollar tomonidan “samosud”ga uchragani to‘g‘risida xabarlar berilgandi.
Izoh (0)