Namangan viloyati Chust tumanida 21 yoshli yigit o‘zidan 4 yosh kichik bolalar tomonidan “samosud” qilindi. Bu haqda “Bu kun” dasturida xabar berildi.
Xabarga ko‘ra, holat Chust tumanidagi mahallalarning birida yashovchi fuqaro 21-aprel kuni soat 14:30 da boshqaruvidagi Damasʼda tanishi — 2007-yilda tug‘ilgan qiz bilan tumanning “Sarimsoqtepa” MFY hududidagi dalada gaplashib o‘tirgan vaqtda sodir bo‘lgan.
Tumanning “Guliston” MFYda yashovchi, 2006-yilda tug‘ilgan fuqaro Sparkʼda bir necha tanishlari bilan kelib, “Bu yerda mashina ichida begona qiz bilan nima qilib o‘tiribsan”, deb yigitni do‘pposlagan. Shuningdek, Damasʼning orqa o‘ng yoritish chiroqlari va o‘ng yon tomondagi orqani ko‘rish oynasini sindirgan. Atrofdagi tanishlari esa mazkur jarayonni tasvirga olib, Instagram’dagi o‘z sahifasiga joylashtirgan.
Qayd etilishicha, 2002-yilda tug‘ilgan fuqaroning badanida aniqlangan tan jarohatlari chap tirsak sohasi, yuz yarasi va chap yonbosh sohasi qontalash ko‘rinishda bo‘lib, uning jarohatlari yengil ekani ko‘rsatilgan.
Holat yuzasidan tuman IIB bo‘limi huzuridagi tergov bo‘linmasi tomonidan Jinoyat kodeksining 277-moddasi 2-qismi “b” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)