Ichki ishlar vazirligi ijtimoiy tarmoqlarda tarqalgan bir erkakning yosh yigitni do‘pposlagani tasvirlangan videoga munosabat bildirdi.
Ma’lum qilinishicha, ijtimoiy tarmoqlarda nomaʼlum kimsa boshqa shaxsni do‘pposlab, unga tan jarohatlari yetkazayotganligi tasvirlangan videolavha O‘zbekiston IIV Tezkor-qidiruv departamenti tomonidan o‘rganilmoqda. Mazkur holat respublika hududidan tashqarida sodir etilgani bo‘yicha birlamchi tezkor maʼlumot olingan.
“Hozirda departament xodimlari tomonidan xorijiy hamkasblar bilan hamkorlikda videolavhada aks etgan fuqarolarning shaxsiga aniqlik kiritish bo‘yicha tezkor-qidiruv tadbirlari amalga oshirilayotgan bo‘lib, ularning natijasi yuzasidan aybdorlarga nisbatan jazo muqarrarligini taʼminlash choralari ko‘riladi”, — deyiladi munosabatda.
Aprel oxirlarida O‘zbekistonda narkozakladchiklarni jazolash bilan shug‘ullanib kelgan 20 kishi qo‘lga olingani to‘g‘risida xabar berilgandi. Shuningdek, Namanganda 21 yoshli yigit o‘zidan kichik bolalar tomonidan “samosud” qilingani, Rossiyada tanishining qulog‘ini kesib tashlagan o‘zbekistonlik erkakka hukm o‘qilgani, Buxorodagi tungi klubda erkak 2 kishini kaltaklagani ma’lum bo‘lgan edi.
Izoh (0)