Jizzax shahrida Labo oqova suv quvuri sabab ag‘darilib ketdi. Holat aks etgan video ijtimoiy tarmoqlarda tarqaldi.
Viloyat YHXB matbuot xizmatining xabar berishicha, voqea 9-may kuni soat taxminan 21:10 larda Jizzax shahar “Ittifoq” mahallasi hududidan o‘tgan yo‘lda yuz bergan. Haydovchi M.M. mashinani boshqarib, ushbu avtomobil yo‘lida joylashgan “Jizzax suv ta’minoti” MCHJga tegishli oqova suvlar quvuri ustidan o‘tgan vaqtida quvurning qopqog‘i ochilib ketishi oqibatida ag‘darilib, yo‘l-transport hodisasiga uchragan.
Hodisa natijasida haydovchi jiddiy tan jarohati olmagan, transport vositasi texnik shikastlangan.
10-may kuni voqea joyi viloyat IIB JXX YHXB va ushbu yo‘lga xizmat ko‘rsatuvchi Sharof Rashidov tuman yo‘llardan foydalanish unitar korxonasi xodimlari ishtirokida ko‘rikdan o‘tkazilganda yo‘l 2020-yilda to‘liq ta’mirlangani, biroq, yuqorida ta’kidlab o‘tilgan yo‘l qismidagi quvur qopqog‘ini ushlab turuvchi moslama atrofida yemirilishlar yuzaga kelgani aniqlangan.
Natijada, ushbu joydan harakatlanib o‘tgan transport vositasi g‘ildiraklarining qatnov qismi yuzasi bilan ishqalanishi vaqtida quvur qopqog‘i uni ushlab turuvchi moslama bilan birga ko‘tarilib ketgan.
Hozirda ushbu yo‘lda aniqlangan kamchiliklar “Jizzax suv ta’minoti” MCHJ tomonidan bartaraf etish choralari ko‘rilmoqda.
Izoh (0)