Andijon tumanida haydovchilik guvohnomasini olish uchun nazariy va amaliy imtihonlar o‘tkaziladigan innovatsion Imtihon markazi ishga tushdi. Bu haqda “Daryo” muxbiri Umidjon Mamarasulov xabar bermoqda.
Butun jarayon to‘liq avtomatlashtirilgan bo‘lib, nazorat qilish inson omilisiz boshqariladigan Markaz har kuni nazariy imtihondan o‘tishni istagan 450 dan ortiq, amaliy imtihonlar bo‘yicha esa 300 nafar nomzodlarni qabul qilishi mumkin.
Nomzod markazga kelib, topshirgan imtihonlarining har bir bosqichi belgilab boriladigan individual QR-kod oladi. Nazariy imtihondan muvaffaqiyatli o‘tish uchun 25 daqiqa ichida 20 ta test savollaridan kamida 18 ta savolga to‘g‘ri javob berishingiz kerak.
Agar imtihonning ushbu qismi muvaffaqiyatli topshirilsa, nomzod amaliy imtihonni topshirish huquqini oladi. Kutish xonasida hammaga ko‘rsatmalar beriladi, shuningdek, video ko‘rsatma ham mavjud bo‘lib, unda mashqlar ketma-ketligi va ularni qanday bajarish kerakligi to‘liq ko‘rsatilgan.
Agar 99 ta jarima bali chegarasidan oshmasa, imtihon muvaffaqiyatli topshirilgan deb hisoblanadi. Imtihonning amaliy qismi muvaffaqiyatli topshirilmagan taqdirda nomzod, nazariy imtihon muvaffaqiyatli topshirilgan kundan boshlab 2 oy ichida har 7 kun oralig‘ida qayta topshirishi mumkin.
Amaliy imtihonni qabul qilish uchun Markazda uchta maydonli avtomatlashtirilgan avtodrom mavjud. Ularning bittasida, B, C va D toifalaridagi, yaʼni yengil avtomobil, yuk mashinasi va avtobusni haydash huquqini beruvchi haydovchilik guvohnomasini olmoqchi bo‘lgan nomzodlar imtihon topshiradilar. Ikkinchisida, A toifasidagi — mototransport vositalarini boshqarish huquqini olishni istaganlar o‘zlarining amaliy ko‘nikmalarini namoyish etadilar. Uchinchisi transport vositalarini tirkama bilan boshqarish uchun BE, CE va DE toifalariga imtihon topshirayotganlar uchun mo‘ljallangan.
Nazariya va amaliyot bo‘yicha qo‘shimcha tayyorgarlikka muhtoj nomzodlar uchun Markazda ekspress-kurslar mavjud.
Imtihonning ikki bosqichidan muvaffaqiyatli o‘tgandan so‘ng, nomzodga YHXBga murojaat etishi kerak bo‘lgan sertifikat beriladi. Berilgan sertifikat YHXB maʼlumotlar bazasidan tekshirilgandan so‘ng, unga haydovchilik guvohnomasi beriladi.
Yo‘l harakati xavfsizligi masalasi bugungi kunda juda muhim hisoblanadi. Toshkent imtihon markazi amaliyotidan ko‘rinib turibdiki, 2022-yilning fevral oyidan dekabrgacha bo‘lgan davrda 27 626 nafar nomzoddan faqat 13 357 nafari imtihondan muvaffaqiyatli o‘tgan, ko‘plari bir necha takroriy imtihonlardan so‘ng.
Izoh (0)