Surxondaryo viloyati hokimi Ulug‘bek Qosimov hududlarga tashrifi davomida belgilab berilgan topshiriqlari bajarilmagani, “Ijro.gov.uz” tizimi orqali ijro uchun yuborilgan topshiriqlarning bajarilishi nazoratdan chiqqani uchun barcha o‘rinbosarlariga ogohlantirish berdi. Bir nechta mansabdorlarga nisbatan intizomiy jazo chorasini qo‘lladi. Bu haqda “Daryo”ga viloyat hokimligi axborot xizmati xabar berdi.
Qayd etilishicha, bugun Ulug‘bek Qosimov shu masalada yig‘ilish o‘tkazgan.
“Hududlarda o‘tkazilgan o‘rganish ishlari jarayonlarida aniq muddat bilan ijrochilarga vazifalar berilgan bo‘lishiga qaramay qator topshiriqlar ijrosi bugungi kunga qadar bajarilmagan. Xususan, viloyat hokimi o‘rinbosarlari tomonidan 18 ta, jumladan, qurilish majmuasi tomonidan 9 ta topshiriq ijrosi taʼminlanmagan. Ushbu topshiriqlar tahlil qilinganda ‘Surxondaryo hududiy elektr tarmoqlari korxonasi’ AJ hamda uning hududiy korxonalari tomonidan 3 ta, ‘Surxondaryoavtoyo‘l’ hududiy yo‘llardan foydalanish tashkiloti 3 ta, ‘Mintaqaviy yo‘llarga buyurtmachi xizmati’ DUK tomonidan 2 ta topshiriq ijrosi bajarilmagan”, — deydi hokimlik axborot xizmati rahbari Murodbek Davlatov.
Qo‘shimcha qilinishicha, yig‘ilish davomida topshiriqlar ijrosi sohalar, yo‘nalishlar va hududlar kesimida tahlil qilingan.
“Ijro intizomini o‘z holiga tashlab qo‘ygan masʼullarga, xususan, viloyat hokimining o‘rinbosarlariga ogohlantirish, qishloq xo‘jaligi majmuasi kotibiyat mudiri, ‘Surxondaryo HETK’ AJ va uning Denov, Muzrabot, Angor, Qiziriq, Jarqo‘rg‘on, Sherobod va Sho‘rchi tumanlari bo‘limlari, ‘Surxondaryoavtoyo‘l’ hududiy yo‘llardan foydalanish tashkiloti, ‘Surxondaryo suv taʼminoti’ MCHJ, ‘Suv taʼminoti va oqova suv tarmoqlari qurilishi bo‘yicha’ IK Surxondaryo viloyati hududiy boshqarmasi, ‘Yagona buyurtmachi xizmati’ IK, ‘Hududgaztaʼminot’ viloyat filiali, ‘O‘zneftgazinpeksiya’ va ‘O‘zenergonazorat’ inspeksiyasi viloyat bo‘limlari rahbarlariga, qator hududlarda tuman hokimlarining o‘rinbosarlariga nisbatan intizomiy jazo chorasini qo‘llash topshirig‘i berildi”, — deydi masʼul.
Yig‘ilish yakunida mutasaddilar har bir topshiriq va aholi murojaatlari bilan ishlashga jiddiy masʼuliyat bilan yondashishi lozimligi taʼkidlanib, hafta davomida bajarilishi lozim bo‘lgan topshiriq va vazifalar belgilab berilgan.
Izoh (0)