Oliy Majlisning Inson huquqlari bo‘yicha vakili (ombudsman) Toshkent shahrida qo‘lga olingan tadbirkorlar qiynoqqa solingani aytilgan xabarlarga munosabat bildirdi.
Namangan viloyati Pop tumani Chodak qishlog‘ida yashovchi Doniyor To‘raxo‘jayevning bosqinchilikda gumonlangan 40 yoshdagi ukasi Dilshodjon 12–15-aprel kunlari Toshkent shahar IIBB Tergov bo‘limi xodimlari tomonidan qiynoqqa solingani, og‘iz va qo‘llari skotch bilan bog‘lanib, shafqatsiz muomalaga duchor qilingani bo‘yicha xabar berilgandi.
Shuningdek, xabarda kuchli taʼsir qiluvchi yoki zaharli moddalarni qonunga xilof ravishda egallash jinoyatini sodir etishda gumonlanib, Toshturmada saqlanayotgan 29 yashar Hasanboy Abdunabiyevga nisbatan sodir etilgan qiynoq natijasida u salkam nogironga aylanib qolgani bayon etilgan.
Hasanboy Abdunabiyev Giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi yoxud zaharli moddalarni o‘tkazish maqsadida qonunga xilof ravishda tayyorlash, qayta ishlash, olish, saqlash, tashish yoki jo‘natish, xuddi shuningdek ularni qonunga xilof ravishda o‘tkazish yoxud ularni o‘tkazish maqsadida tayyorlash yoxud qayta ishlash uchun asbob-uskunalarni tayyorlash, olish, saqlash, tashish, jo‘natish yoki o‘tkazish bo‘yicha gumonlangan.
Ombudsmanga advokat U.M.ning himoyasi ostidagi Hasanboy Abdunabiyev qiynoqqa solingani haqida yuborgan murojaati tezkorlik bilan ijroga qaratilib, 1-may kuni ushbu murojaat Jinoyat-protsessual kodeksi talablari asosida ko‘rib chiqish uchun Bosh prokuraturaga ombudsmanning alohida nazorat xati orqali yuborilgan.
Ta’kidlanishicha, ombudsman va uning huzuridagi Jamoatchilik guruhi vakillari tomonidan xabarlarda qayd etilgan shaxslar bilan uchrashib, holi tarzda suhbatlashishlari uchun navbatdan tashqari monitoring tashrifini tashkil qilish ham rejalashtirilgan.
Qayd etilishicha, ombudsmanga yuborilgan qiynoqqa oid murojaatlar, jumladan, ijtimoiy tarmoqlarda eʼlon qilingan xabarlar darhol nazoratga olinadi va o‘rganiladi.
“O‘zbekiston inson qadr-qimmatini yerga uradigan, insoniylikka zid bo‘lgan qiynoqlarning har qanday ko‘rinishiga qarshi kurash yo‘lini tanlagan. Shu nuqtayi nazardan qiynoqqa oid murojaatlar alohida nazorat ostida bo‘ladi. Ombudsman qiynoq holatlarining oldini olish va bartaraf etish tarafdori”, — deyiladi ombudsman xabarida.
“Ezgulik” jamiyati raisi Abdurahmon Tashanovga ko‘ra, Dildoshjon To‘raxo‘jayev fuqaro kiyimidagi jinoyat qidiruv bo‘limi xodimlari, qora maxsus kiyimdagi ‘ajal farishtalari’ va tergovchilar tomonidan majburiy ko‘rsatma olish maqsadida qiynoqqa solingan.
O‘z navbatida Ichki ishlar vazirligi mazkur qiynoq holatlariga munosabat bildirdi. “Yuqorida bayon etilgan jinoyat ishlari bo‘yicha gumondorlarning ayrimlari muntazam ravishda sport bilan shug‘ullanib kelgani, ilgari ko‘chada turli mushtlashuvlarda qatnashganligi aniqlangan bo‘lib, hozirda uchinchi shaxslar orqali ilgari mavjud bo‘lgan jarohatlarini pesh qilgan holda ijtimoiy tarmoqlarda huquqni muhofaza qilish organlariga nisbatan ishonchsizlik va nosog‘lom shov-shuv uyg‘otish maqsadi ko‘zlanayotganligi haqida maʼlumotlar mavjud. Har bir holat yuzasidan prokuratura organlari tomonidan o‘rganish ishlari olib borilmoqda”, — deyiladi idora xabarida.
Izoh (0)