Олий Мажлиснинг Инсон ҳуқуқлари бўйича вакили (омбудсман) Тошкент шаҳрида қўлга олинган тадбиркорлар қийноққа солингани айтилган хабарларга муносабат билдирди.
Наманган вилояти Поп тумани Чодак қишлоғида яшовчи Дониёр Тўрахўжаевнинг босқинчиликда гумонланган 40 ёшдаги укаси Дилшоджон 12–15 апрель кунлари Тошкент шаҳар ИИББ Тергов бўлими ходимлари томонидан қийноққа солингани, оғиз ва қўллари скотч билан боғланиб, шафқатсиз муомалага дучор қилингани бўйича хабар берилганди.
Шунингдек, хабарда кучли таъсир қилувчи ёки заҳарли моддаларни қонунга хилоф равишда эгаллаш жиноятини содир этишда гумонланиб, Тоштурмада сақланаётган 29 яшар Ҳасанбой Абдунабиевга нисбатан содир этилган қийноқ натижасида у салкам ногиронга айланиб қолгани баён этилган.
Ҳасанбой Абдунабиев Гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи ёхуд заҳарли моддаларни ўтказиш мақсадида қонунга хилоф равишда тайёрлаш, қайта ишлаш, олиш, сақлаш, ташиш ёки жўнатиш, худди шунингдек уларни қонунга хилоф равишда ўтказиш ёхуд уларни ўтказиш мақсадида тайёрлаш ёхуд қайта ишлаш учун асбоб-ускуналарни тайёрлаш, олиш, сақлаш, ташиш, жўнатиш ёки ўтказиш бўйича гумонланган.
Омбудсманга адвокат У.М.нинг ҳимояси остидаги Ҳасанбой Абдунабиев қийноққа солингани ҳақида юборган мурожаати тезкорлик билан ижрога қаратилиб, 1 май куни ушбу мурожаат Жиноят-процессуал кодекси талаблари асосида кўриб чиқиш учун Бош прокуратурага омбудсманнинг алоҳида назорат хати орқали юборилган.
Таъкидланишича, омбудсман ва унинг ҳузуридаги Жамоатчилик гуруҳи вакиллари томонидан хабарларда қайд этилган шахслар билан учрашиб, ҳоли тарзда суҳбатлашишлари учун навбатдан ташқари мониторинг ташрифини ташкил қилиш ҳам режалаштирилган.
Қайд этилишича, омбудсманга юборилган қийноққа оид мурожаатлар, жумладан, ижтимоий тармоқларда эълон қилинган хабарлар дарҳол назоратга олинади ва ўрганилади.
“Ўзбекистон инсон қадр-қимматини ерга урадиган, инсонийликка зид бўлган қийноқларнинг ҳар қандай кўринишига қарши кураш йўлини танлаган. Шу нуқтаи назардан қийноққа оид мурожаатлар алоҳида назорат остида бўлади. Омбудсман қийноқ ҳолатларининг олдини олиш ва бартараф этиш тарафдори”, — дейилади омбудсман хабарида.
“Эзгулик” жамияти раиси Абдураҳмон Ташановга кўра, Дилдошжон Тўрахўжаев фуқаро кийимидаги жиноят қидирув бўлими ходимлари, қора махсус кийимдаги ‘ажал фаришталари’ ва терговчилар томонидан мажбурий кўрсатма олиш мақсадида қийноққа солинган.
Ўз навбатида Ички ишлар вазирлиги мазкур қийноқ ҳолатларига муносабат билдирди. “Юқорида баён этилган жиноят ишлари бўйича гумондорларнинг айримлари мунтазам равишда спорт билан шуғулланиб келгани, илгари кўчада турли муштлашувларда қатнашганлиги аниқланган бўлиб, ҳозирда учинчи шахслар орқали илгари мавжуд бўлган жароҳатларини пеш қилган ҳолда ижтимоий тармоқларда ҳуқуқни муҳофаза қилиш органларига нисбатан ишончсизлик ва носоғлом шов-шув уйғотиш мақсади кўзланаётганлиги ҳақида маълумотлар мавжуд. Ҳар бир ҳолат юзасидан прокуратура органлари томонидан ўрганиш ишлари олиб борилмоқда”, — дейилади идора хабарида.
Изоҳ (0)