Andijon viloyatining Shahrixon tumanida yashagan 32 yoshli Sanjarbek Mamajonov 2022-yilning 21-mart kuni Shahrixon tuman IIB xodimlari va bir nafar mahkum tomonidan qiynoqqa solinishi oqibatida tergov hibsxonasida vafot etgan. Bu haqda O‘zbekiston inson huquqlari “Ezgulik” jamiyati raisi Abdurahmon Tashanov Facebook’dagi sahifasida maʼlum qildi.
Maʼlum bo‘lishicha, Andijon viloyatining Shahrixon tumanida yashagan 1990-yilda tug‘ilgan Sanjarbek Mamajonov 2021-yilning 28-yanvar kuni Jinoyat ishlari bo‘yicha Shahrixon tuman sudida juda ko‘p miqdorda o‘g‘rilik qilishda ayblanib, 2 yil muddatga ozodlikdan mahrum qilingan. Jinoyat ishlari bo‘yicha Qarshi shahar sudining 2021-yil 10-sentabrdagi ajrimi bilan o‘talmay qolgan 1 yil 3 oy 12 kunlik ozodlikdan mahrum qilish jazosi shu muddatga axloq tuzatish ishlariga almashtirilgan.
Biroq Sanjarbek Mamajonov axloq tuzatish jazosini o‘tamaganligi sababli 2022-yil 18-mart kuni jinoyat ishlari bo‘yicha Shahrixon tuman sudi ajrimiga ko‘ra o‘talmay qolgan 1 yil 3 oy 12 kun muddatli axloq tuzatish ishlari shu muddatga ozodlikdan mahrum qilish jazosiga almashtirilgan. Va u Shahrixon tuman katta probatsiya inspektorlari K.Boymatov, J.Asronov va Sh.Maʼmurovlar tomonidan tibbiy ko‘rikdan o‘tkazilib, sihat-salomatligi aniqlangach, tuman IIB navbatchilik qismining vaqtincha saqlash xonasiga joylashtirilgan.
2022-yilning 19-mart kuni esa IIB xodimlari M.Qodirov hamda Sh.Maʼmurov hamrohligida ikkinchi mintaqaviy hudud 3-son tergov hibsxonasiga o‘tkazilgan. O‘sha kuni tergov hibsxonasining 58-kamerasiga o‘tkazilgan mahkum o‘zini yomon his qilayotganini aytgach, 20-mart kuni 49-kameraga joylashtirilgan. Mahkum bu kamerada ham tobi yo‘qligini aytib, boshqa mahkumlarga xalal bergach, ayblov xulosasida aytilishicha, hibsxonaning 7 nafar xodimi tomonidan kamerasiz xonada to‘rt soatdan ortiq vaqt davomida ayovsiz kaltaklanib, aynan shu kamerada nomaʼlum muddatga ushlab turilgan. Keyin esa soat 11:00 larda mahkumning sog‘lig‘i yomonlashganiga qaramasdan boshqa kameraga o‘tkazilgan. Mahkum o‘sha kamerada boshqa bir mahkum tomonidan ham kaltaklangan. O‘z vaqtida yordam ko‘rsatilmaganligi sababli o‘sha kuni soat 14:30 da vafot etgan.
“Ezgulik” jamiyati raisi Toshkent shahar IIBB tergov bo‘limida ham shafqatsiz qiynoqlarga solish holati yuz berayotganini bildirgan.
Taʼkidlanishicha, “Ezgulik” jamiyatiga murojaat qilgan Namangan viloyati Pop tumani Chodak qishlog‘ida yashovchi Doniyor To‘raxo‘jayev bosqinchilikda gumonlangan 40 yashar ukasi Dilshodjonning 2023-yilning 12—15-aprel kunlari Toshkent shahar IIBB tergov bo‘limida shafqatsiz qiynoqlarga solinganini bildirgan.
“Og‘zi va qo‘llari skotch bilan bog‘lanib, noinsoniy qiynoqlarga solinganini iddao qilgan. Surishtiruv, advokatlari va guvohlar bilan suhbatlardan so‘ng maʼlum bo‘ldiki, Dildoshjon To‘raxo‘jayev haqiqatan ham fuqaro kiyimidagi jinoyat qidiruv bo‘limi xodimlari, qora maxsus kiyimdagi ‘ajal farishtalari’ va tergovchilar tomonidan majburiy ko‘rsatma olish maqsadida qiynoqqa solingan.
Jinoyat kodeksining 251-moddasida nazarda tutilgan jinoyatni sodir etishda gumonlanib, Toshturmada saqlanayotgan 29 yashar Hasanboy Abdunabiyevga nisbatan sodir etilgan qiynoq natijasida u salkam nogironga aylanib qoldi. Uning badaniga elektroshoker vositasida yetkazilgan zarar rasmlarda ham aks etgan. Uning momataloq badanidagi jarohatlar hanuz ketgani yo‘q.
Afsuski, bunday qiynoq va zo‘ravonliklardan huquqni muhofaza qilish organi tugul qiynoqlarga qarshi milliy preventiv mexanizmlarni amalga oshirganini iddao qilayotgan ombudsmanning ham xabari bor. Katta ehtimol bilan ular bunday jinoyatlarni yashirishga harakat qilishadi, jamoatchilikni aldash, mamlakatda qiynoqlarga barham berilgan, degan yolg‘on hisobotlar bilan chiqishadi”, — deyiladi Abdurahmon Tashanovning bu haqdagi chiqishida.
Izoh (0)