2-may kuni Germaniya poytaxti Berlin shahrida Germaniya—O‘zbekiston biznes-forum bo‘lib o‘tdi. Forum yakunlari bo‘yicha O‘zbekiston energetika vaziri Jo‘rabek Mirzamahmudov “Daryo” muxbiriga intervyu berdi.
Vazir Germaniyaning “Siemens energy” kompaniyasi bilan kelishuv haqida fikrlarini bildirib o‘tdi.
“Bugungi forumning naqadar muhimligini ishtirokchilar zalga sig‘may qolganidan ham bilsa bo‘ladi. Germaniyaning moliya institutlari bo‘ladimi, kompaniyalarimi, hammasi ”yashil energetika“, ”yashil iqtisodiyot“ bo‘yicha gapirishdi. Turli yo‘nalishlarda kelishuvlarga erishdik. Eng avvalo, ”Siemens energy“ kompaniyasining to‘g‘ridan-to‘g‘ri investitsiyalari, uni zamonaviy texnologiyalarini qo‘llash, ularni o‘rnatish bo‘yicha Surxondaryodagi yangi issiqlik elektr stansiyasida, Navoiyda kimyo klasteri doirasida tashkil qilinayotgan yangi generatsiya quvvatlariga hamda quyosh va shamol energetikasi bo‘yicha hamkorlik qilishni kelishib oldik.
Ularning to‘g‘ridan-to‘g‘ri investitsiyalar qiymati 3 mlrd dollardan oshiq bo‘ladi. Surxondaryodagi loyiha bu yil qurilishini boshlaydi, Navoiydagisi keyingi yil, quyosh va shamol bo‘yicha ishchi guruh qilib, hududlarni energobalansi, quvvatlarning muvofiqligini birgalikda o‘rgangan holda, kelasi yili boshlashni rejalashtirganmiz.
Bugungi kelishuvlardan so‘ng aholi nimani sezadi? Birinchi o‘rinda, barqaror energo taʼminoti. 2025/26 yillarda ishga tushiriladigan yangi quvvatlar orqali yuqori samaradorlik bilan ishlaydigan turbinalar, bu gaz sarfini kamaytirish, qo‘shimcha elektr energiya ishlab chiqarish, atrofga zaxarli chiqindilarni chiqishini kamaytirish va eng asosiysi tarmoqqa yetarli darajada elektr quvvatini yetkazib berish orqali aholi farovonligini oshirish uchun”, — deydi Mirzamahmudov.
Izoh (0)