O‘zbekiston qishloq xo‘jaligi vaziri Aziz Voitov 2-may kuni Berlinda bo‘lib o‘tgan Germaniya—O‘zbekiston biznes-forum yuzasidan o‘z fikrlarini bildirib o‘tdi. Bu haqda “Daryo” muxbiri xabar berdi.
Xususan, vazir biznes-forum juda ko‘tarinki ruhda bo‘lib o‘tganini aytdi.
“Ikki mamlakatning tadbirkorlari, masʼul idora vakillari o‘rtasida shartnomalar imzolandi, kelishuvlarga erishildi. Jumladan, qishloq xo‘jaligi yo‘nalishida gapiradigan bo‘lsam, biz ko‘p tomonlama masalalarni kelishib oldim. Bunda ham ilm yo‘nalishida o‘zimizni talabalarimizni o‘qitish, yaʼni ikki tomonlama talabalar almashinuvi bo‘yicha, veterenariya hamda parrandachilik sohasida kelishuvlarga erishdik”, — deydi u.
Aziz Voitovning aytishicha, raqamlashtirish sohasida “BayWa” kompaniyasi bilan shartnoma imzolangan.
“Big Dutchman” kompaniyasi bilan parrandachilik sohasidagi uskunalarni nafaqat yetkazib berish, balki ularni O‘zbekistonda ishlab chiqarish, xizmat ko‘rsatish hamda talabalarimiz va ishlab chiqarishda ishlayotgan xodimlarimizni o‘qitish masalalari ham kelishib olindi. Eng asosiysi, nemis banklari bilan ushbu loyihalarni moliyalashtirish bo‘yicha ham uzoq muddatli kelishuvlarga erishdik.
Hozirgi vaqtda 118 mln dollarlik 6 ta shartnoma imzolandi. Bundan tashqari 100 mln dollarga yaqin eksport shartnomalari imzolanish arafasida", — deya qo‘shimcha qiladi qishloq xo‘jaligi vaziri.
Izoh (0)