O‘zbekistondagi IT Park 2023-yilning 1-choragida 57,2 mln dollarlik IT xizmatlarini eksport qildi va mazkur ko‘rsatkich 2022-yilning mos davriga nisbatan uch barabor ko‘p. Bu haqda IT Park xabar bermoqda.
O‘zbekiston IT sohasi rekord darajadagi o‘sish sur’atlarini namoyish etmoqda. Mamlakat o‘z salohiyatini muvaffaqiyatli amalga oshirishda davom etmoqda va xorijiy kompaniyalarni jalb qilish uchun ko‘proq imkoniyatlar yaratmoqda.
Soha rivojiga IT Park Uzbekistan ham salmoqli hissa qo‘shmoqda. 2023-yilning 1-choragidagi maʼlumotlar IT sohasi ijobiy dinamikani saqlab qolganligini ko‘rsatadi.
IT Parkʼda rezidentlik
Masalan, 2023-yilning 1-choragi yakunlari bo‘yicha rezidentlar tomonidan ko‘rsatilgan xizmatlarning umumiy hajmi 2,4 trln so‘mni tashkil etdi. O‘tgan yilning shu davriga nisbatan IT Park rezident kompaniyalari tomonidan ko‘rsatilgan xizmatlar hajmi 292 foizga oshdi. Taqqoslash uchun: 2021-yilning 1-choragidagi maʼlumotlar 438,6 mlrd so‘mni, 2022-yilda esa 814 mlrd so‘m bo‘lgan.
Yo‘nalishlar bo‘yicha hajm quyidagicha taqsimlandi:
- dasturlash — 1,35 trln so‘m;
- qayta ishlash — 839,9 mlrd so‘m;
- ta’lim — 25,6 mlrd so‘m;
- BPO — 157,1 mlrd so‘m.
IT Park rezidentlari eksporti hajmi o‘tgan yilning 1-choragiga nisbatan 327 foizga oshib, 57,2 mln dollarni tashkil etdi. Ulardan 48 foizi AQSHga, qolganlari esa Buyuk Britaniyaga (15 foiz), Singapurga (10 foiz), MDH mamlakatlariga (10 foiz) va boshqalarga (17 foiz) to‘g‘ri keladi. 2023-yil oxiriga kelib eksport hajmi 300 mln dollarga yetishi kutilmoqda.
Joriy yilning birinchi choragida IT Park rezidentlari soni 1 262 ta kompaniyani tashkil etdi, ulardan:
— 876 nafar rezident Toshkent shahrida, qolgan 386 nafari viloyatlarda ro‘yxatdan o‘tgan;
— 382 ta korxona eksport uchun ishlaydi;
— 172 ta BPO kompaniyalari;
— 256 ta kompaniya IT sohasida taʼlim xizmatlarini ko‘rsatadi;
— xorijiy kapital ishtiroki bilan 185 ta kompaniya.
Rezidentlarning asosiy ulushi quyidagi yo‘nalishlarda ishlaydi:
- dasturiy taʼminotni ishlab chiqish va qo‘llab-quvvatlash (61 foiz);
- maʼlumotlarni qayta ishlash (5 foiz);
- IT-taʼlim (20 foiz);
- BPO (14 foiz).
Birinchi chorakda 207 ta kompaniya IT Park rezidenti statusini oldi, ulardan 61 tasi eksportyor bo‘lib, joriy yil oxiriga qadar eksport hajmi 55 mln dollarni tashkil etilishi rejalashtirilgan.
Shu bilan birga, 71 ta kompaniyaga rezident statusi berilmagan, 63 ta kompaniya esa shartnomada ko‘rsatilgan majburiyatlarni bajarmaganligi, yaʼni faoliyat to‘g‘risida maʼlumot bermaganligi, majburiy ajratmalarni to‘lamaganligi uchun ushbu statusdan mahrum qilingan.
Shuningdek, ushbu kompaniyalarga nisbatan berilgan imtiyozlarni bekor qilish va davlat byudjetiga soliq to‘lash bo‘yicha majburiyatlarni tiklash to‘g‘risida soliq organlariga bildirishnoma yuborilgan.
Bundan tashqari, taqdim etilayotgan imtiyozlar tufayli IT Park rezidentlari qo‘shimcha ish o‘rinlarini yaratib, mamlakatimizda IT-mutaxassislar sonini ko‘paytirishmoqda.
Shunday qilib, joriy yilning 1-choragida rezident kompaniyalarda 2100 dan ortiq ish o‘rni yaratildi. Ishga joylashgan mutaxassislarning umumiy soni 20 000dan oshdi, bu 2022-yil oxiridagi ko‘rsatkichga nisbatan 12 foizga ko‘pdir.
IT Park rezidentlari IT-kompaniyalar va IT-o‘quv markazlari bo‘lib, ular bir qator muhim imtiyozlarga ega bo‘lishi mumkin:
- daromad solig‘i — 7,5 foiz;
- korporativ soliq — 0 foiz;
- yagona ijtimoiy to‘lovlar — 0 foiz;
- tovarlarni o‘z ehtiyojlari uchun import qilishda bojxona to‘lovlari — 0 foiz.
Shuningdek, IT Park rezidentlari xorijiy mutaxassislar va taʼsischilarga ish haqi va dividendlarni eksport tushumlari doirasida xalqaro to‘lov kartalariga naqd pulsiz shaklda xorijiy valyutada to‘lash huquqiga ega.
Bundan tashqari, IT Park rezidentlariga Virtual ofis xizmati taqdim etiladi, bu esa ofisni ijaraga olmasdan masofadan turib ishlash imkoniyatini beradi.
-29.jpg)
Startap ekotizimining rivojlanishi
IT Park tomonidan (shu jumladan, boshqa tashkilotlar bilan hamkorlikda) startaplarni qo‘llab-quvvatlashga qaratilgan 8 ta tadbir va 5 ta dastur tashkil etildi, ulardan eng yiriklari:
- “Plug and Play Uzbekistan” akseleratsiya dasturining birinchi to‘lqini
- “AloqaTechLab” korporativ akseleratorining ikkinchi to‘lqini
- “Tumaris.Expo” xalqaro startaplar ko‘rgazmasi
2023-yilning 1-choragida O‘zbekiston startaplari davlat organlaridan 17 mlrd so‘mdan ortiq mablag‘ olishga muvaffaq bo‘ldi. Xorijiy moliyalashtirish summasi 1 million 904 ming dollarga yetdi.
Xalqaro faoliyat
Joriy yilda IT Park’ni rivojlantirishning asosiy yo‘nalishi xalqaro aloqalarni o‘stirish va mustahkamlashga qaratilgan. 2023-yilning 1-choragida IT Park delegatsiyalari dunyoning 7 ta davlatida (Germaniya, Ispaniya, Buyuk Britaniya, BAA, Hindiston, Qozog‘iston, Singapur) ishbilarmonlik tashrifi bilan bo‘ldi.
6 ta xalqaro tadbirda ishtirok etib, xorijiy kompaniya va tashkilotlar bilan 39 ta ishbilarmonlik uchrashuvlari tashkil etildi. Xuddi shu davrda IT Park jamoasi 30 dan ortiq davlatdan kelgan xorijiy vakillar bilan 120 dan ortiq yuzma-yuz va masofaviy uchrashuvlar o‘tkazdi. Ko‘plab muzokaralar natijasida qo‘shma loyihalar, memorandumlar imzolandi va 30 dan ortiq xorijiy kompaniyalar O‘zbekistonga jalb etildi.
Izoh (0)