Ўзбекистондаги IT Park 2023 йилнинг 1-чорагида 57,2 млн долларлик IT хизматларини экспорт қилди ва мазкур кўрсаткич 2022 йилнинг мос даврига нисбатан уч барабор кўп. Бу ҳақда IT Park хабар бермоқда.
Ўзбекистон IT соҳаси рекорд даражадаги ўсиш суръатларини намойиш этмоқда. Мамлакат ўз салоҳиятини муваффақиятли амалга оширишда давом этмоқда ва хорижий компанияларни жалб қилиш учун кўпроқ имкониятлар яратмоқда.
Соҳа ривожига IT Park Uzbekistan ҳам салмоқли ҳисса қўшмоқда. 2023 йилнинг 1-чорагидаги маълумотлар IT соҳаси ижобий динамикани сақлаб қолганлигини кўрсатади.
IT Park’да резидентлик
Масалан, 2023 йилнинг 1-чораги якунлари бўйича резидентлар томонидан кўрсатилган хизматларнинг умумий ҳажми 2,4 трлн сўмни ташкил этди. Ўтган йилнинг шу даврига нисбатан IT Park резидент компаниялари томонидан кўрсатилган хизматлар ҳажми 292 фоизга ошди. Таққослаш учун: 2021 йилнинг 1-чорагидаги маълумотлар 438,6 млрд сўмни, 2022 йилда эса 814 млрд сўм бўлган.
Йўналишлар бўйича ҳажм қуйидагича тақсимланди:
- дастурлаш — 1,35 трлн сўм;
- қайта ишлаш — 839,9 млрд сўм;
- таълим — 25,6 млрд сўм;
- BPО — 157,1 млрд сўм.
IT Park резидентлари экспорти ҳажми ўтган йилнинг 1-чорагига нисбатан 327 фоизга ошиб, 57,2 млн долларни ташкил этди. Улардан 48 фоизи АҚШга, қолганлари эса Буюк Британияга (15 фоиз), Сингапурга (10 фоиз), МДҲ мамлакатларига (10 фоиз) ва бошқаларга (17 фоиз) тўғри келади. 2023 йил охирига келиб экспорт ҳажми 300 млн долларга етиши кутилмоқда.
Жорий йилнинг биринчи чорагида IT Park резидентлари сони 1 262 та компанияни ташкил этди, улардан:
— 876 нафар резидент Тошкент шаҳрида, қолган 386 нафари вилоятларда рўйхатдан ўтган;
— 382 та корхона экспорт учун ишлайди;
— 172 та BPО компаниялари;
— 256 та компания IT соҳасида таълим хизматларини кўрсатади;
— хорижий капитал иштироки билан 185 та компания.
Резидентларнинг асосий улуши қуйидаги йўналишларда ишлайди:
- дастурий таъминотни ишлаб чиқиш ва қўллаб-қувватлаш (61 фоиз);
- маълумотларни қайта ишлаш (5 фоиз);
- IT-таълим (20 фоиз);
- BPО (14 фоиз).
Биринчи чоракда 207 та компания IT Park резиденти статусини олди, улардан 61 таси экспортёр бўлиб, жорий йил охирига қадар экспорт ҳажми 55 млн долларни ташкил этилиши режалаштирилган.
Шу билан бирга, 71 та компанияга резидент статуси берилмаган, 63 та компания эса шартномада кўрсатилган мажбуриятларни бажармаганлиги, яъни фаолият тўғрисида маълумот бермаганлиги, мажбурий ажратмаларни тўламаганлиги учун ушбу статусдан маҳрум қилинган.
Шунингдек, ушбу компанияларга нисбатан берилган имтиёзларни бекор қилиш ва давлат бюджетига солиқ тўлаш бўйича мажбуриятларни тиклаш тўғрисида солиқ органларига билдиришнома юборилган.
Бундан ташқари, тақдим этилаётган имтиёзлар туфайли IT Park резидентлари қўшимча иш ўринларини яратиб, мамлакатимизда IT-мутахассислар сонини кўпайтиришмоқда.
Шундай қилиб, жорий йилнинг 1-чорагида резидент компанияларда 2100 дан ортиқ иш ўрни яратилди. Ишга жойлашган мутахассисларнинг умумий сони 20 000дан ошди, бу 2022 йил охиридаги кўрсаткичга нисбатан 12 фоизга кўпдир.
IT Park резидентлари IT-компаниялар ва IT-ўқув марказлари бўлиб, улар бир қатор муҳим имтиёзларга эга бўлиши мумкин:
- даромад солиғи — 7,5 фоиз;
- корпоратив солиқ — 0 фоиз;
- ягона ижтимоий тўловлар — 0 фоиз;
- товарларни ўз эҳтиёжлари учун импорт қилишда божхона тўловлари — 0 фоиз.
Шунингдек, IT Park резидентлари хорижий мутахассислар ва таъсисчиларга иш ҳақи ва дивидендларни экспорт тушумлари доирасида халқаро тўлов карталарига нақд пулсиз шаклда хорижий валютада тўлаш ҳуқуқига эга.
Бундан ташқари, IT Park резидентларига Виртуал офис хизмати тақдим этилади, бу эса офисни ижарага олмасдан масофадан туриб ишлаш имкониятини беради.
-29.jpg)
Стартап экотизимининг ривожланиши
IT Park томонидан (шу жумладан, бошқа ташкилотлар билан ҳамкорликда) стартапларни қўллаб-қувватлашга қаратилган 8 та тадбир ва 5 та дастур ташкил этилди, улардан энг йириклари:
- “Plug аnd Play Uzbekistan” акселерация дастурининг биринчи тўлқини
- “АloqaTechLab” корпоратив акселераторининг иккинчи тўлқини
- “Тumaris.Expo” халқаро стартаплар кўргазмаси
2023 йилнинг 1-чорагида Ўзбекистон стартаплари давлат органларидан 17 млрд сўмдан ортиқ маблағ олишга муваффақ бўлди. Хорижий молиялаштириш суммаси 1 миллион 904 минг долларга етди.
Халқаро фаолият
Жорий йилда IT Park’ни ривожлантиришнинг асосий йўналиши халқаро алоқаларни ўстириш ва мустаҳкамлашга қаратилган. 2023 йилнинг 1-чорагида IT Park делегациялари дунёнинг 7 та давлатида (Германия, Испания, Буюк Британия, БАА, Ҳиндистон, Қозоғистон, Сингапур) ишбилармонлик ташрифи билан бўлди.
6 та халқаро тадбирда иштирок этиб, хорижий компания ва ташкилотлар билан 39 та ишбилармонлик учрашувлари ташкил этилди. Худди шу даврда IT Park жамоаси 30 дан ортиқ давлатдан келган хорижий вакиллар билан 120 дан ортиқ юзма-юз ва масофавий учрашувлар ўтказди. Кўплаб музокаралар натижасида қўшма лойиҳалар, меморандумлар имзоланди ва 30 дан ортиқ хорижий компаниялар Ўзбекистонга жалб этилди.
Изоҳ (0)