Birlashgan Millatlar Tashkiloti Turkiya prezidenti Rajab Toyyib Erdo‘g‘onga “don kelishuvi” bo‘yicha “yo‘l xaritasi”ni yubordi, dedi Turkiya tashqi ishlar vaziri Mevlut Chavusho‘g‘li. Hujjat Rossiya qishloq xo‘jaligi mahsulotlari uchun to‘lovlarda Turkiyaning vositachiligini ko‘zda tutadi. Uning so‘zlariga ko‘ra, shunga o‘xshash “xaritalar”ni Rossiya prezidenti Vladimir Putin va Ukraina rahbari Vladimir Zelenskiy ham olgan.
“Yo‘l xaritasi don shartnomasini uzaytirish bo‘yicha turli takliflarni, jumladan, Odessa portidan Rossiya ammiakini eksport qilish va to‘lov masalasida Turkiya bilan hamkorlik qilishni o‘z ichiga oladi”, — dedi Chavusho‘g‘li TRT Haber telekanaliga bergan intervyusida.
Vazirning so‘zlariga ko‘ra, yo‘l xaritalari mamlakatlar rahbarlariga BMT bosh kotibi Antoniu Guterrish tomonidan yuborilgan.
Tomonlarning don bo‘yicha kelishuvi 18-mayda tugaydi. Shartnomani uzaytirish uchun Rossiya mamlakatga qishloq xo‘jaligi texnikasini yetkazib berishni qayta tiklash, sug‘urtaga qo‘yilgan cheklovlarni olib tashlashni va portlarga kirishga qo‘yilgan taqiqlarni bekor qilishni, Tolyatti—Odessa ammiak quvurining faoliyatini tiklashni va Rossiya g‘allasiga haq to‘lanishi uchun “Rosselxozbank”ni SWIFT xalqaro pul o‘tkazish tizimiga qayta ulashni talab qilmoqda. 28-aprel kuni Rossiya prezidentining matbuot kotibi Dmitriy Peskov kelishuvni uzaytirish istiqbollari “unchalik yaxshi emas”ligiga ishora qildi.
O‘z navbatida Yevropa Ittifoqi Rossiya bilan don shartnomasini uzaytirmaslik oqibatlari halokatli bo‘ladi, deb hisoblaydi. G7 mamlakatlari tashqi ishlar vazirlari ham g‘alla kelishuvi o‘ta muhim ekanini, Rossiya uning muddatini cheklamasligi kerakligini ta’kidlagan.
Rossiya va Ukraina o‘rtasida don kelishuvi BMT va Turkiya yordami bilan tinimsiz muzokaralardan so‘ng 2022-yilng 22-iyulida imzolangan edi.
Izoh (0)