Бирлашган Миллатлар Ташкилоти Туркия президенти Ражаб Тоййиб Эрдўғонга “дон келишуви” бўйича “йўл харитаси”ни юборди, деди Туркия ташқи ишлар вазири Мевлут Чавушўғли. Ҳужжат Россия қишлоқ хўжалиги маҳсулотлари учун тўловларда Туркиянинг воситачилигини кўзда тутади. Унинг сўзларига кўра, шунга ўхшаш “хариталар”ни Россия президенти Владимир Путин ва Украина раҳбари Владимир Зеленский ҳам олган.
“Йўл харитаси дон шартномасини узайтириш бўйича турли таклифларни, жумладан, Одесса портидан Россия аммиакини экспорт қилиш ва тўлов масаласида Туркия билан ҳамкорлик қилишни ўз ичига олади”, — деди Чавушўғли TRT Haber телеканалига берган интервьюсида.
Вазирнинг сўзларига кўра, йўл хариталари мамлакатлар раҳбарларига БМТ бош котиби Антониу Гутерриш томонидан юборилган.
Томонларнинг дон бўйича келишуви 18 майда тугайди. Шартномани узайтириш учун Россия мамлакатга қишлоқ хўжалиги техникасини етказиб беришни қайта тиклаш, суғуртага қўйилган чекловларни олиб ташлашни ва портларга киришга қўйилган тақиқларни бекор қилишни, Толятти—Одесса аммиак қувурининг фаолиятини тиклашни ва Россия ғалласига ҳақ тўланиши учун “Росселхозбанк”ни SWIFT халқаро пул ўтказиш тизимига қайта улашни талаб қилмоқда. 28 апрель куни Россия президентининг матбуот котиби Дмитрий Песков келишувни узайтириш истиқболлари “унчалик яхши эмас”лигига ишора қилди.
Ўз навбатида Европа Иттифоқи Россия билан дон шартномасини узайтирмаслик оқибатлари ҳалокатли бўлади, деб ҳисоблайди. G7 мамлакатлари ташқи ишлар вазирлари ҳам ғалла келишуви ўта муҳим эканини, Россия унинг муддатини чекламаслиги кераклигини таъкидлаган.
Россия ва Украина ўртасида дон келишуви БМТ ва Туркия ёрдами билан тинимсиз музокаралардан сўнг 2022 йилнг 22 июлида имзоланган эди.
Изоҳ (0)