O‘zbekistonda salohiyatli kadrlar rezervini shakllantirish uchun 1 000 nafar nomzod saralab olindi. Bu haqda Davlat xizmatini rivojlantirish agentligi axborot xizmati xabar berdi.
Shavkat Mirziyoyev topshirig‘iga binoan salohiyatli kadrlar rezervini shakllantirish bo‘yicha topshiriqlar ijrosini o‘z vaqtida va sifatli ta’minlash maqsadida mahallalardagi hokim yordamchilari, yoshlar yetakchilari va xotin-qizlar faollari orasidan ming nafari saralab olingan.
Ushbu yo‘nalishdagi ishlar Oila va xotin-qizlar qo‘mitasi, Mahallabay ishlash va tadbirkorlikni rivojlantirish agentligi, Yoshlar ishlari agentligi hamda mahalliy hokimliklar bilan hamkorlikda tashkil etilgan. Jami 754 nafar hokim yordamchisi, 196 nafar yoshlar yetakchisi va 50 nafar xotin-qizlar faoli saralab olingan.
Nomzodlarning kompetensiyalarini rivojlantirish, ular orasidan eng munosiblarini yuqori lavozimlarga tavsiya etish maqsadida agentlik tomonidan qator ishlar amalga oshirilmoqda. Jumladan, nomzodlarning bir yilga mo‘ljallangan shaxsiy rivojlanish rejasi ishlab chiqilgan. Masofaviy ta’lim platformasi orqali turli sohalar bo‘yicha malakasi oshirilgan. Mahalliy hokimliklar bilan hamkorlikda reja-jadval ishlab chiqilib, ularning stajirovka o‘tashi ta’minlangan.
Joriy yilning 23-martidan boshlab ikki hafta muddatga 388 nafar nomzod Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari o‘rinbosarlari, tuman (shahar) hokimlari, shuningdek, Davlat xizmatini rivojlantirish agentligi hududiy filiallari rahbarlariga dublyor sifatida biriktirilgan.
Nomzodlarning ma’lumot bazasini to‘liq shakllantirish, ularning reytingini yuritish maqsadida “Zaxira.argos.uz” raqamli platformasi ishga tushirildi. Ushbu dastur orqali shaxsiy rivojlanish rejasining bajarilishi, masofaviy malaka oshirish kursi, stajirovka va dublyorlik natijalaridan kelib chiqib, nomzodlarning reyting ko‘rsatkichlari shakllantiriladi.
Eng yuqori ko‘rsatkichlarni qayd qilgan nomzodlarni joriy yilda xorijiy malaka oshirish dasturlari va stajirovkaga yuborish hamda rahbarlik lavozimlariga tavsiya etish rejalashtirilgan. O‘tgan davr ichida mehnat faoliyatida ijobiy yutuqlarga erishgan Salohiyatli kadrlar rezervidagi nomzodlarning 45 nafari turli darajadagi rahbarlik lavozimlariga tayinlandi.
Izoh (0)