Toshkent shahri Mirzo Ulug‘bek tumanida 6 yoshli bola chuqurga tushib ketdi. Tuman hokimligi holat yuzasidan munosabat bildirdi.
Ijtimoiy tarmoqlarda tarqalgan xabarga ko‘ra, 13-aprel kuni ona va bola “Parkent” ko‘chasida yo‘l chetidan ketayotgan bo‘lgan. Bola onasidan uzoqlashib, pandusdan chiqayotganda chuqurga tushib ketgan. Shundan so‘ng bola atrofdagi ishchilar tomonidan qutqarib olingan.
Hokimlik xabariga ko‘ra, ushbu hududda ichimlik suvi ta’minotidagi quvurlardan birida avariya holati aniqlangan va tuman suv tarmoqlari bo‘limi tomonidan holatni bartaraf etishda qazish ishlari olib borilgan. Qazish ishlari yo‘lning avtomobillar uchun qatnov qismida bo‘lgani sababli ogohlantirish belgilari joylashtirilgan, piyodalar yo‘lagida harakatlanish mumkin bo‘lgan.
Yo‘lovchilarning e’tiborsizligi oqibatida 6 yoshlardagi A.A. onasidan oldinroq borib, chuqurlikka tushgan va ushbu hududdagi fuqarolar tomonidan chiqarib olingan. Avariya holatini bartaraf etishda yo‘l qo‘yilgan kamchilik va noqulayliklar uchun tuman suv tarmoqlari bo‘limi uzr so‘ragan. Hududdagi betartiblikni bartaraf etish, jarayonlarda yo‘lovchi va avtomobillar uchun ogohlantirish belgilari, xavfsiz harakatlanish choralari ko‘rilgan.
Izoh (0)