Ўзбекистонда салоҳиятли кадрлар резервини шакллантириш учун номзодлар саралаб олинди

Ўзбекистонда салоҳиятли кадрлар резервини шакллантириш учун 1 000 нафар номзод саралаб олинди. Бу ҳақда Давлат хизматини ривожлантириш агентлиги ахборот хизмати хабар берди.

Шавкат Мирзиёев топшириғига биноан салоҳиятли кадрлар резервини шакллантириш бўйича топшириқлар ижросини ўз вақтида ва сифатли таъминлаш мақсадида маҳаллалардаги ҳоким ёрдамчилари, ёшлар етакчилари ва хотин-қизлар фаоллари орасидан минг нафари саралаб олинган.

Ушбу йўналишдаги ишлар Оила ва хотин-қизлар қўмитаси, Маҳаллабай ишлаш ва тадбиркорликни ривожлантириш агентлиги, Ёшлар ишлари агентлиги ҳамда маҳаллий ҳокимликлар билан ҳамкорликда ташкил этилган. Жами 754 нафар ҳоким ёрдамчиси, 196 нафар ёшлар етакчиси ва 50 нафар хотин-қизлар фаоли саралаб олинган.

Номзодларнинг компетенсияларини ривожлантириш, улар орасидан энг муносибларини юқори лавозимларга тавсия этиш мақсадида агентлик томонидан қатор ишлар амалга оширилмоқда. Жумладан, номзодларнинг бир йилга мўлжалланган шахсий ривожланиш режаси ишлаб чиқилган. Масофавий таълим платформаси орқали турли соҳалар бўйича малакаси оширилган. Маҳаллий ҳокимликлар билан ҳамкорликда режа-жадвал ишлаб чиқилиб, уларнинг стажировка ўташи таъминланган.

Жорий йилнинг 23 мартидан бошлаб икки ҳафта муддатга 388 нафар номзод Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари ўринбосарлари, туман (шаҳар) ҳокимлари, шунингдек, Давлат хизматини ривожлантириш агентлиги ҳудудий филиаллари раҳбарларига дублёр сифатида бириктирилган.

Номзодларнинг маълумот базасини тўлиқ шакллантириш, уларнинг рейтингини юритиш мақсадида “Zaxira.argos.uz” рақамли платформаси ишга туширилди. Ушбу дастур орқали шахсий ривожланиш режасининг бажарилиши, масофавий малака ошириш курси, стажировка ва дублёрлик натижаларидан келиб чиқиб, номзодларнинг рейтинг кўрсаткичлари шакллантирилади.

Энг юқори кўрсаткичларни қайд қилган номзодларни жорий йилда хорижий малака ошириш дастурлари ва стажировкага юбориш ҳамда раҳбарлик лавозимларига тавсия этиш режалаштирилган. Ўтган давр ичида меҳнат фаолиятида ижобий ютуқларга эришган Салоҳиятли кадрлар резервидаги номзодларнинг 45 нафари турли даражадаги раҳбарлик лавозимларига тайинланди.