O‘zbekistondan Qozog‘istonga eksport qilingan pomidorlarda xavfli virus aniqlangani haqida xabarlar tarqaldi. Qishloq xo‘jaligi vazirligi holat yuzasidan munosabat bildirdi.
O‘simliklar karantini va himoyasi agentligi tomonidan holatga aniqlik kiritish maqsadida dastlabki tezkor surishtiruv va o‘rganishlar olib borilgan. Natijalarga ko‘ra, Qozog‘iston tomoni O‘zbekistondan import bo‘lgan pomidor mahsulotlarida pomidor jigarrang virusi va boshqa karantin kasalliklar aniqlangani yuzasidan mahsulotlarni orqaga qaytarish holati kuzatilmagan va e’tiroznoma jo‘natmagan.
Shu bilan birga, O‘zbekiston va Qozog‘iston karantin xizmatlari bilan tezkor ravishda muzokara olib borilib, ushbu tarqalgan xabarga izoh bergan fitosanitariya xizmatining Turkiston viloyati hududiy inspeksiyasi rahbari I.Begasilov pomidor jigarrang virusi aniqlanish holati yuzasidan import bo‘lgan 43 tonna pomidor mahsulotida, aynan, O‘zbekistondan yuklangan pomidor mahsulotida xavfli virus qayd etilmaganini telefon muloqotida tasdiqladi.
Vazirlikning qayd etishicha, jahon bozoriga xavfsiz, tekshirilgan va turli kasalliklardan holi mahsulotlarni chiqarish, xalqaro qishloq xo‘jaligi maydonida O‘zbekiston brendi nufuzini mustahkamlash maqsadida har bir qishloq xo‘jaligi mahsuloti partiyasidan namunalar olinib, Markaziy fitosanitariya laboratoriyasida ekspertizadan o‘tkazilib, laboratoriyaning xulosasiga ko‘ra eksport va import jarayonlari amalga oshiriladi. Jumladan pomidor jigarrang virusini aniqlash uchun ham namunalar 8 soat davomida maxsus polimeraza zanjir reaksiyasi (PZR) testidan o‘tkaziladi.
Izoh (0)