ИИВ Тезкор-қидирув департаменти томонидан аёлларни хорижий валютада баҳолаб, интим хизматлар кўрсатиш учун шароит яратиб берган ҳамда ёш қизларни чет мамлакатларга олиб бориб, тазйиқ ва зўравонлик остида мажбуран шаҳвоний эксплуатация қилиб келган гуруҳлар фаолиятига чек қўйилди. Бу ҳақда ИИВ матбуот хизмати хабар берди.

Қайд этилишича, 7 март куни Тезкор-қидирув департаменти Жиноят-қидирув хизмати ходимлари томонидан тезкор тадбир ўтказилган. Тадбир давомида 3,2 минг доллар эвазига Бўстонлиқ туманидаги дала ҳовлилардан бирига мижоз билан жинсий алоқа қилиш учун қўл остидаги қизлардан 5 нафарини олиб келиб бераётган жиноий гуруҳ қўлга олинган.

Шунингдек, 28 март куни ўтказилган тадбирда эса кузатувда бўлган яна бир гуруҳ икки аёлни Россиянинг Қозон шаҳрига фоҳишаликда ишлатиш учун Фарғона халқаро аэропорти орқали юбораётганида ушланган.

4 апрель куни бўлса, Тошкент ва Хоразм вилоятларида яшовчи икки нафар қизни Дубайга юбораётган жиноий гуруҳ аъзолари қўлга олинган.

Ҳозирда ушбу гуруҳлар томонидан шаҳвоний эксплуатация қилиш мақсадида олиб кетилган бошқа қизларнинг шахсини аниқлашга доир тадбирлар давом этмоқда. Аниқланган ҳолатлар бўйича жиноят ишлари қўзғатилган.

Аввалроқ Тошкент вилоятида қизларни Индонезияга фоҳишаликка юбормоқчи бўлганлар қамалгани тўғрисида хабар берилганди. Шунингдек, Самарқандда 29 ёшли фуқарони Дубайга фоҳишаликка юбораётган аёл ушлангани, Интерпол одам савдоси бўйича қидирувда бўлган аёлни БААдан Ўзбекистонга депортация қилгани маълум бўлганди.