Toshkent viloyatida odam savdosi bilan shug‘ullanayotgan er-xotin faoliyatiga chek qo‘yildi. Bu haqda viloyat ichki ishlar bosh boshqarmasi axborot xizmati xabar berdi.
Qayd etilishicha, 13-dekabr kuni viloyat IIBB uyushgan jinoyatchilikka qarshi kurash bo‘limi xodimlari tomonidan o‘tkazilgan tezkor tadbirda 1978-yilda tug‘ilgan, Yuqori Chirchiq tumanida yashovchi (M.U.) shaxs namanganlik 19 va 27 yoshli opa-singilni aldab, ishonchiga kirib, ularni mo‘may daromad topishga ishontirgan. Toshkent—Hindiston aviayo‘nalishi orqali fohishalik bilan shug‘ullanishlari uchun yubormoqchi bo‘lgan vaqtida Islom Karimov nomidagi Toshkent xalqaro aeroportda qo‘lga olingan.
Aniqlanishicha, ushlangan shaxsning shar’iy nikohdagi xotini hozirgi kunda Hindistonda bo‘lib, qizlarni kutib olishi va ularga fohishalik qilishlari uchun sharoit yaratishi rejalashtirilgan. Hatto qizlarning Hindistonga borish va viza xarajatlarini o‘zlari to‘lab bergan.
Hozirda holat yuzasidan ushlangan shaxs va uning xotiniga nisbatan Qibray tumani ichki ishlar bo‘limi tergov bo‘linmasi tomonidan Jinoyat kodeksining 135-moddasi (odam savdosi) 2-qismi bilan jinoyat ishi qo‘zg‘atilgan. Shuningdek, jinoyatga aloqador bo‘lgan, muqaddam Parkent tumanida yashagan, bugungi kunda Hindistonda bo‘lib turgan 32 yoshli ayolni ushlash (ekstraditsiya qilish) choralari ko‘rilmoqda.
Ma’lumot o‘rnida, viloyat ichki ishlar bosh boshqarmasi tezkor xodimlari tomonidan 2022-yilning o‘tgan davri mobaynida 8 ta holatda 15 nafar shaxs qo‘lga olingan. Tadbirlar natijasida 12 nafar shaxsning, jumladan, 9 nafar ayolning odam savdosi qurboni bo‘lishining oldi olingan.
Mavzuga doir:
Izoh (0)