Kambag‘allikni qisqartirish va bandlik vazirligi “Oliy ta’lim muassasalari talabalarini mutaxassisligi bo‘yicha ishlashiga imkoniyat yaratish chora-tadbirlari to‘g‘risida”gi Vazirlar Mahkamasi qarori loyihasini muhokamaga qo‘ydi.
Unga ko‘ra mazkur qaror qabul qilinsa:
- oliy taʼlim muassasalari talabalarini ikkinchi kursdan (ayrim taʼlim yo‘nalishlarida ikkinchi kursdan keyingi kurslardan) boshlab oliy taʼlim muassasasi rahbari tomonidan berilgan sertifikat asosida mutaxassisligi bo‘yicha o‘qishdan bo‘sh vaqtida ishlashiga ruxsat etiladi;
- haq to‘lanadigan ishlab chiqarish amaliyoti va haq to‘lanadigan stajirovka o‘tayotgan talabalarni ishga qabul qilishda sertifikat talab qilinmaydi;
- talabalarni sertifikat asosida mutaxassisligi bo‘yicha ishlashiga faqat oliy taʼlim muassasasida o‘qiyotgan davrida ruxsat etiladi.
Shuningdek, Oliy taʼlim, fan va innovatsiyalar vazirligiga ikki oy muddatda quyidagilarni nazarda tutuvchi talabalarga mutaxassisligi bo‘yicha ishlash huquqini beruvchi sertifikat berish tartibini ishlab chiqish va tasdiqlash vazifalari yuklanadi:
- sertifikat beriladigan taʼlim yo‘nalishlari ro‘yxati;
- sertifikatni taʼlim yo‘nalishlari bo‘yicha qaysi kursdan boshlab berilishi;
- sertifikatni berishda inobatga olinadigan holatlar.
Kambag‘allikni qisqartirish va bandlik vazirligi oliy taʼlim muassasalari talabalarini o‘qish davrida mutaxassisligi bo‘yicha ishlashini inobatga olib, 2024-yilga qadar Xizmatchilarning asosiy lavozimlari va ishchilar kasblarining klassifikatori hamda malaka darajalariga erishish sxemasiga o‘zgartirish va qo‘shimchalar kiritish choralarini ko‘rishi taklif etilmoqda.
2022-yil mart oyidagi videoselektor yig‘ilishida Shavkat Mirziyoyev talabalar bandligini ta’minlash masalalari yuzasidan bir qator topshiriqlar bergandi. O‘shanda oliygohlar atrofidagi maktab va bog‘chalarda 13 ming vakant ish o‘rinlari mavjudligi aytilgandi. Kamida 10 ming nafar talabani ular uchun joylashuvi qulay bo‘lgan maktab va bog‘chalarga ishga joylashtirish mumkinligi ko‘rsatib o‘tilgan.
Prezident mazkur videoselektor yig‘ilishida o‘zining yoshlik yillarini yodga olgan edi. “Men o‘zim talaba bo‘lganimda ikkita joyda ishlar edim. Bizda “voyennaya kafedra” bor edi va nasoslarni “regulirovka” qilish bo‘yicha. Hozirgacha esimdan chiqmaydi, ikkita joyda yaxshi oylik olar edim. 56 so‘m bitta kafedradan, 42 so‘m bitta kafedradan”, — degandi prezident.
Izoh (0)