AQSH prezidenti Jo Bayden The Wall Street Journal muxbiri va AQSH fuqarosi Evan Gershkovichning Rossiyada hibsga olinishini “mutlaqo noqonuniy” deb atadi. U amerikalik diplomatlarga haligacha jurnalist bilan bog‘lanishga ruxsat berilmaganini qayd etdi.
“Biz bo‘layotgan voqealar mutlaqo noqonuniy ekanini aniq qilib aytmoqdamiz, buni rasman e’lon qildik ham”, — dedi Bayden Irlandiyaga uchishidan oldin.
AQSH elchixonasi xodimlari haligacha jurnalist bilan uchrashmagani haqidagi savolga izoh berar ekan, Bayden: “Buning sababi yetarlicha harakat qilinmayotgani emas”, dedi.
Shuningdek, parvoz vaqtida Bayden Rossiyada hibsga olingan muxbirning ota-onasi bilan telefon orqali muloqot qildi.
Qo‘ng‘iroq chog‘ida AQSH prezidenti “o‘zining milliy xavfsizlik guruhi Evan va Rossiya tomonidan noqonuniy ushlab turilgan boshqa shaxslarning ozod etilishini ta’minlashga e’tibor qaratib kelayotgani va bundan keyin ham shunday bo‘lishini aytdi”.
Avvalroq AQSH Davlat departamenti Evan Gershkovichni “nohaq hibsga olingan” deb e’lon qilgandi. Bu jurnalistni almashish bo‘yicha muzokaralar olib borishga potensial yo‘l ochadi.
WSJ muxbiri Evan Gershkovich mart oyi oxirida Yekaterinburgda josuslikda ayblanib hibsga olingan edi. Rossiya Federal xavfsizlik xizmati da’vo qilishicha, jurnalist go‘yoki Rossiya harbiy-sanoat kompleksi korxonalaridan biri haqida maxfiy ma’lumotlarni to‘plagan.
AQSH Davlat kotibi Entoni Blinken Rossiya rasmiylari Gershkovichni josuslik ishi bo‘yicha noqonuniy hibsga olganiga “shubha qilmasligini” aytdi. Blinken 2-aprel kuni Rossiya tashqi ishlar vaziri Sergey Lavrov bilan suhbatda shu haqda gapirgan.
Izoh (0)