AQSH Davlat departamenti Wall Street Journal muxbiri Evan Gershkovichni “nohaq hibsga olingan” deb e’lon qildi, bu jurnalistni almashish bo‘yicha muzokaralar olib borishga potensial yo‘l ochadi, deb xabar bermoqda WSJ nashri.
Nashrga ko‘ra, Gershkovich ishi bilan Davlat departamenti tarkibidagi AQSH prezidentining garovga olinganlar ishlari bo‘yicha maxsus elchisi ofisi sifatida tanilgan bo‘lim shug‘ullanmoqda. Bu bo‘lim boshqa mamlakatlarda nohaq ushlab turilgan amerikaliklarni ozod qilish bo‘yicha muzokaralar olib boradi, deya qayd etdi gazeta.
Avvalroq AQSH Davlat kotibi Entoni Blinken Rossiya rasmiylari Gershkovichni josuslik ishi bo‘yicha noqonuniy hibsga olganiga “shubha qilmasligini” aytgandi. Blinken 2-aprel kuni Rossiya tashqi ishlar vaziri Sergey Lavrov bilan suhbatda shu haqda gapirgan.
WSJ muxbiri Evan Gershkovich mart oyi oxirida Yekaterinburgda josuslikda ayblanib hibsga olingan edi. Rossiya Federal xavfsizlik xizmati da’vo qilishicha, jurnalist go‘yoki Rossiya harbiy-sanoat kompleksi korxonalaridan biri haqida maxfiy ma’lumotlarni to‘plagan. Meduza xabariga ko‘ra, Gershkovich hibsga olinishidan avval “Uralvagonzavod” mudofaa zavodi joylashgan Nijniy Tagil shahriga borgan. Gershkovich bilan bir vaqtda “Uralvagonzavod”da ishlagan nijniy tagillik er-xotin hibsga olingan.
Izoh (0)