Amerikaning The Wall Street Journal (WSJ) nashrining Moskvadagi byurosi jurnalisti Evan Gershkovichga Rossiya tergov qo‘mitasi tomonidan josuslik bo‘yicha ayblov e’lon qilindi, deb yozmoqda “Interfaks”.
“Gershkovichga ayblov e’lon qilindi, u Rossiya Jinoyat kodeksining 276-moddasida ko‘rsatilgan jinoyatni sodir etganlikda gumonlanmoqda”, — deyiladi nashr xabarida.
AQSH fuqarosi Gershkovichning hibsga olingani haqida 30-mart kuni Rossiya FXX Jamoatchilik bilan aloqalar markazi xabar bergan edi. Shu kuni Moskvaning Lefortovo sudi tergov talabiga binoan jurnalistni 29-maygacha hibsga oldi.
FXX tushuntirishicha, Gershkovich Yekaterinburgda “maxfiy ma’lumot olishga urinayotganda” ushlangan. Keyinroq Rossiya prezidentining matbuot kotibi Dmitriy Peskov jurnalist “jinoyat ustida qo‘lga olinganini” aytdi.
AQSH davlat kotibi Entoni Blinken Rossiya tashqi ishlar vaziri Sergey Lavrov bilan suhbatda WSJ jurnalistining qo‘lga olinishidan xavotir bildirdi va uni zudlik bilan ozod etishga chaqirdi.
Bundan tashqari, Blinken Amerika fuqarolarini zudlik bilan Rossiyani tark etishga chaqirgan. Polsha ham o‘z fuqarolaridan Rossiyani tark etishni so‘ragan.
The Wall Street Journal tahririyati Rossiya elchisi va barcha rossiyalik jurnalistlarni AQSHdan chiqarib yuborishga chaqirdi. Bloomberg, The New York Times, The Washington Post va Politico nashrlari ham Rossiyadan amerikalik jurnalist Evan Gershkovichni ozod qilishni talab qildi.
Shuningdek, rossiyalik jurnalistlar va jamoat arboblari Gershkovichga qo‘yilgan ayblovning mazmun-mohiyati ishonchliligiga shubha bildirib, uni ozod qilishga chaqirdi.
Izoh (0)